Një banesë në rrugën ‘Shotë Galica’ në Prizren u shndërrua në skenë krimi, mëngjesin e hershëm të së martës.
Brenda saj, dyshohet që burri M.G me anë të një thike vrau vajzën e tij 15 vjeçare S.G dhe plagosi rëndë edhe vajzën tjetër 10 vjeçare.
Po ashtu 44 vjeçari dyshohet që sulmoi me mjet të mprehtë edhe gruan e tij, e cila mbeti e lënduar.
Krejt në fund M.G i shkaktoi lëndime edhe vetes, i cili më pastaj mori trajtim në Spitalin e Prizrenit.
Gjithë familja janë me shtetësi turke.
Në vendngjarje doli kryeprokurori i Prizrenit, Petrit Kryeziu i cili tha detaje për rastin.
“Po flasim për një rast i cili jemi në fazë shumë të hershme dhe sapo kemi dalë nga këqyrja e vendit të ngjarjes dhe motivet ende nuk i kemi të qarta, kemi disa informacione të cilat nuk mund t’i ndajmë me opinionin mirëpo ajo çfarë mund të konfirmojë është fakti që kemi të bëjë me një rast faktikisht i dyshuari dhe familjari dhe viktimat janë shtetas të huaj, shtetas turk, është hera e parë që janë në evidencat policore pa dyshim edhe prokuroriale sepse nuk ka të kaluar kriminale” , tha Kryeziu.
Ai tregoi se në deklarimet e fqinjëve për këtë familje, ata e kanë përshkruar autorin e dyshuar të krimit si njeri të qetë dhe se nuk kanë vërejtur tek ta ndonjë shqetësim.
“Kryerësi i veprës penale ka qenë duke punuar në njërin prej lokaleve gastronomike, nga informatat që i kemi marrë në këtë objekt ku ka ndodhur vepra kanë jetuar rreth gjashtë muaj së bashku me familjen… Ne jemi kujdesur edhe në këtë drejtim, e thashë që jemi në fazë shumë të hershme, kemi biseduar dhe kërkuar përmes ILECU-ut dhe presim informatat se çka do të na vijnë nga shteti turk”, shtoi kryeprokurori i Prizrenit.
Derisa për gjendjen e vajzës, dhanë detaje shkurt nga Klinika Emergjente në Qendrën Klinike Universitare të Kosovës.
“Gjendja e saj tani është stabile, është dërguar për trajtim të mëtutjeshëm në Klinikën e ORL-së ku edhe pritet t’i nënshtrohet një intervenimi kirurgjik”, tha Naser Syla.
Rastin e kanë konfirmuar edhe nga Policia e Kosovës.
“Policia përmes telefonit ka marrë informatën se në rrugën ‘Shote Galica’ në Prizren ndodhet një person i lënduar dhe se emergjenca mjekësore nuk po mund t’i jep ndihmë ngase një i dyshuar ndodhet me thikë ne dorë. Në atë drejtim janë nisur katër patrulla policore. Në vend ngjarje është kuptuar se një i dyshuar M.G. viti i lindjes 1981, mashkull ka therur me thikë dy vajzat e tij, njëra 15 vjeçare e cila ka mbetur e vdekur në vend të ngjarjes dhe tjetra e lënduar rëndë”, thuhet nga policia.
Për këtë vrasje kanë reaguar edhe presidentja Osmani, e cila i ka shkruar se kur ndodh një rast si ky, atëherë nuk është vetëm tragjedi familjare, por një alarm që kumbon fort për të gjithë.
Edhe ministrja në detyrë e Drejtësisë, Albiulena Haxhiu ka reaguar duke thënë që institucionet përgjegjëse po e trajtojnë rastin e vrasjes në Prizren me prioritet të lartë.
Për rastin ka reaguar edhe shkolla Fillore e Mesme e Ulët “Emin Duraku” në Prizren, në të cilën e ndjera po vijonte mësimin.
Motivet e këtij akti tragjik ende nuk dihen.
