Mbrëmjen e së dielës, në lagjen Aktash të kryeqytetit u dëgjuan breshëri plumbash. E nga kjo përleshje mes dy familjeve, Gashi dhe Sekiraqa u vra një person dhe pesë të tjerë u plagosën rënde. Gjendja e të plagosurve sipas mjekëve në QKUK është jashtë rrezikut për jetë pavarësisht që njëri nga ta ka plagë rrëshqitëse edhe në kokë. Nga Prokuroria Themelore në Prishtinë thonë se ky konflikt është vazhdimësi e një mosmarrëveshje muaj më parë.
Nëntëdhjete e shtatë shenja të krimit u regjistruan në këtë vend ku mbeti i vrarë një person mbrëmjen e së dielës.
E përveç tij, nga gjuajtjet e dy grupeve në rrugën “Gazmend Zajmi” në Prishtinë mbetën të plagosur edhe pesë persona.
Madje në vendin e ngjarjes u gjet edhe një kallashnikov.
Edhe pas më shumë se dymbëdhjetë orëve, hetuesit u panë u panë aty duke i vazhduar ekzaminimet.
E të hënën zyrtarët policor u panë edhe në Qendrën Klinike Universitare të Kosovës.
Pesë të plagosurit, sipas Policisë së Kosovës po marrin trajtim nën “masën e arrestit dhe mbikëqyrjes policore”
Dy prej tyre po marrin trajtim në Kliniken e Ortopedisë dhe gjendja e tyre është jashtë rrezikut për jetë.
Sipas drejtorit të kësaj klinike, Xhavit Gashi plagët janë kryesisht në pjesën e poshtme të trupit.
E të plagosur ka edhe në Kirurgjinë Abdominale.
Ushtruesi i detyrës së shefit të repartit, Vesel Skenderi ka thënë se njëri prej tyre ka plagë edhe në kokë.
“Nga Prokuroria Themelore në Prishtinë kanë deklaruar se incidenti i mbrëmshëm në mes dy grupeve siç i quajnë autoritetet, të armatosura është vazhdimësi e një mosmarrëveshje muaj më parë”, tha Skenderi.
“Rasti penal është filluar në drejtim të veprës penale “Vrasja e Rendë” në bashkëkryerje, si dhe veprën penale “Mbajtja në pronësi, kontroll ose posedim të paautorizuar të armëve” ku në këtë rast me vendim të prokurorit janë ndaluar pesë (5) persona, si dhe janë duke u zhvilluar veprime hetimore në identifikimin e personave të tjerë të përfshirë në këtë rast pasi që dyshohet se në këtë rast janë të përfshirë edhe persona të tjerë ende të pa identifikuar”, thuhet nga Prokuroria Themelore në Prishtinë.
Dy grupet, Gashi dhe Sekiraqa kishin pasur konflikte edhe në muajin mars të këtij viti, ku në këtë përleshje mbeti i plagosur një person.
