Një ngjarje e pazakontë ndodhi mbrëmjen e së mërkurës në fshatin Brod të Shtërpcës.
Kjo meqë një 5-vjeçare u sulmua nga një ujk përderisa po qëndronte në oborrin e shtëpisë së saj.
Sipas dëshmisë së familjarëve, kafsha e egër e ka tërhequr zvarrë vajzën për disa metra jashtë oborrit.
Kësisoj, e mitura ka pësuar lëndime në zonën e gjoksit dhe të shpinës.
Detaje për televizionin dhanë nga QKUK.
“Janë dhënë vaksinat, sipas protokollit, si dhe është konsultuar psikologu klinik për vlerësimin dhe mbështetjen e gjendjes emocionale të fëmijës. Pavarësisht gjendjes stabile, për arsye të monitorimit dhe mundësisë së ndryshimeve eventuale, pacientja do të qëndrojë për disa ditë në klinikë”, thuhet nga ShSKUK.
E rastin e kanë konfirmuar edhe nga Policia e Kosovës.
“Më datë 27 gusht 2025, në orën 21:45, Policia në Shtërpcë është informuar për një sulm që ka ndodhur në lagjen ”Coklarë” të fshatit Brod, ku një ujk ka sulmuar një fëmijë. Sipas familjarëve, sulmi kishte ndodhur rreth orës 19:00 kur fëmija, 5 vjeç ishte në oborrin e shtëpisë”, ka thënë zëdhënsi, Kanun Veseli.
Aktualisht, 5-vjeçarja po vazhdon të marrë trajtim në QKUK.
