Shiritat e sigurisë i janë vendosur.
Kjo pasi një shtëpi në fshatin Gracë të Vushtrrisë mbrëmë u përfshi nga flakët.
E për pasojë, një grua e moshuar vdiq.
E moshuara, nga komuniteti serb, po jetonte e vetme në këtë shtëpi.
Siç bënë të ditur banorët e fshatit mbrapa kamerës së tëvë1, ata kishin parë tymin që kishte përfshirë shtëpinë.
Kësisoj, kishin telefonuar menjëherë Ambulancën dhe Policinë e Kosovës.
Këta të fundit treguan se vdekja e viktimës është konfirmuar nga ekipet emergjente në vendin e ngjarjes.
Derisa i gjithë rasti është duke u hetuar.
“Me datën 15 janar 2026, rreth orës 22:20, Policia ka pranuar informatën se në fshatin Gracë të Vushtrrisë, një shtëpi banimi është kapluar nga zjarri. Njësitet përkatëse policore dhe zjarrfikëse kanë dalë menjëherë në vendngjarje. Si pasojë e përfshirjes së shtëpisë nga zjarri , në vendngjarje ka humbur jetën viktima femër, e moshës rreth 80-vjeçare”, thuhet nga Policia e Kosovës.
Me vendim të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore (IML) për obduksion.
