Erdhën për të pirë e ngrënë.
Por qëndrimi në këtë restorant në Lagjen “Veternik” të kryeqytetit, përfundoi keq për tre persona.
Rreth orës 6:30, një 39 vjeçar, 24 vjeçare si dhe një 19 vjeçar morën lëndime nga një mjet shpërthyes.
E rreth orës 8, te tre këta u pranuan nga stafi shëndetësor në QKUK në gjendje shëndetësore stabile.
Dy vajzat kishin lëndime në krah, kurse burri mori terapi edhe në sy.
“Tek njëra paciente ka pasur lëndime në pjesën e krahut dhe parakrahut ku pjesët metalike të mjetit shpërthyes janë ende prezentë në ekstremitetin e saj, te një paciente tjetër mjeti shpërthyes konkretisht fragmentim gjendet ne pjesën e krahut, dhe tek një pacient kemi lëndim të krahut dhe eskruacion te sklerotikes se syrit ky pacient është pranuar në klinikë e oftalmologjisë, ndërsa dy pacientë tjerë janë liruar me terapi në shtëpi”, tha Avdush Bajgora, mjek në QKUK.
Nga Policia e Kosovës kanë bërë të ditur se janë duke e hetuar rastin.
“Rreth orës 06:30, është raportuar për një rrahje mes disa personash që ka eskaluar në gjuajtje me armë zjarri, të ndodhur në lagjen Veterniku në Prishtinë.Me të marrë informatën, policia ka dalë në vendin e ngjarjes dhe nga informacionet e para është bërë e ditur se për pasojë tre persona kanë marrë plagë nga arma e zjarrit.Ndërkohë që të plagosurit janë dërguar në QKUK për trajtimin e nevojshëm mjekësor, policia po vijon punën e saj me veprime të ekzaminimit të vendngjarjes si dhe me veprime të tjera operativo-hetimore me qëllim identifikimin e të dyshuarve të implikuar në rast, si dhe sqarimin e plotë të rrethanave të ngjarjes”, njoftoi zëdhënsi i policisë, Agron Borovci.
Në lëvizje është vënë edhe Prokuroria Themelore në Prishtinë.
“Referuar pyetjeve tuaja, lidhur me rastin e ndodhur sot, në lagjen “Veterniku” në Prishtinë, ju njoftojmë se pas pranimit të informatë nga policia, prokurori kujdestar nga Departamenti për Krime të Rënda i kësaj Prokurorie, ka autorizuar të njëjtit t’i ndërmarrin të gjitha veprimet e nevojshme hetimore, të cilat do t’i ndriçojnë rrethanat e rastit Nga hetimet preliminare dyshohet se pas një mosmarrëveshje mes disa personash, ka pasur të shtëna me armë zjarri dhe nga kjo ngjarje kanë mbetur të lënduar tre persona, me ç’ rast janë dërguar në QKUK për ta marrë ndihmën e nevojshme mjekësore”, tha Laureta Ulaj –zëdhënëse e Prokurorisë Themelore në Prishtinë.
Në këtë fazë sipas zëdhënëse së Prokurorisë Themelore në Prishtinë, nuk mund të japin informata të tjera, për shkak se janë duke u kryer hetime karshi këtij rasti.
Ekipi i Tëvë1 ka tentuar të kontaktoj edhe me pronarin e restoranit ku ndodhi ngjarje por nuk pranoi të fliste.
