Hyrja e një qendre tregtare në Prishtinë, të hënën u shndërrua në skenë krimi.
Ky furgon që po barte para, u bë cak i një tentim-grabitje.
Por, jo gjithçka shkoi siç e kishin planifikuar grabitësit.
Këta të fundit hasën në rezistencë nga pjesëtarët e sigurimit të kompanisë që po i transmetonin paratë.
Nga të shtënat, i plagosur rëndë mbeti punëtori i kompanisë së sigurimit.
Nga Qendra Klinike Universitare të Kosovës, për Tëvë1 kanë thënë se burri është i plagosur në pjesën e stomakut dhe i është nënshtruar një operimi.
Plagë mori edhe njëri nga grabitësit.
Pas plagosjes, ky i fundit në gjendje të rëndë kërkoi ndihmë në qendrën emergjente në Graçanicë.
Për këtë, edhe identiteti i tij, u bë i njohur për organet e rendit.
Bëhet fjalë për Millosh Vukojeviq nga Leposaviqi, i cili më pas u transportua në QKUK..
Ndërsa vetura më të cilën dyshohet se u krye grabitja, u gjet në rrugën Pal Mëlyshi.
Mjeti më targa gjermane, ishte djegur tërësisht.
Ndërsa rastin e kanë konfirmuar edhe nga Policia e Kosovës.
“Sot rreth orës 10:30, kemi pranuar informatën për të shtëna me armë në lagjen Veternik në Prishtinë, ku është plagosur një person. Bazuar në të dhënat e deritanishme, rasti dyshohet se ka ndodhur gjatë një grabitjeje të armatosur ndaj pjesëtarëve që po siguronin një furgon që transportonte para”.
Nga Policia e Kosovës thonë se në koordinim me prokurorinë, janë duke u ndërmarrë të gjitha masat e nevojshme për identifikimin dhe arrestimin e të dyshuarve.
