Një person të martën gjuajti me armë zjarri ndaj një polici në Pejë. I dyshuari u arrestua dhe rasti u cilësuar si vrasje në tentativë. E raste të tilla dhe sulmeve ndaj zyrtarëve policorë po kërkohet që të dënohen maksimalisht nga sistemi gjyqësor.
Po dilte nga vendi i punës në stacionin policor të Pejës pasditen e së martës.
Zyrtari policor posa kaloi rrugën u përballë me një qytetar nga një veturë në lëvizje.
Një person tentoi ta godasë me veturë policin ndaj të cilit edhe gjuajti me armë zjarri, por që i njëjti shpëtoi pa lëndime.
Lehtë nuk e patën as kolegët e tij nga Prishtina.
Ata, arrestuan dy persona të armatosur, ku njëri nga ta tentoi të ikte.
Sulmet ndaj zyrtarëve policorë, i ka dënuar Sindikata e Policisë, e cila thotë se akti në Pejë është kriminal i papranueshëm dhe përbën sulm të drejtpërdrejt ndaj institucioneve dhe sigurisë publike.
“Sindikata i bën thirrje organeve të drejtësisë që të veprojnë me vendosmëri, duke siguruar që autori i këtij akti të përballet me dënimin maksimal që parashikon ligji. Sulmet ndaj zyrtarëve policorë nuk duhet të tolerohen dhe duhet të trajtohen me prioritet për të dërguar një mesazh të qartë se ligji dhe rendi janë të pacenueshëm. Zyrtarët policorë janë shtylla e sigurisë së qytetarëve dhe mbrojtjes së institucioneve të shtetit.”
Se është shqetësuese kjo dukuri e thotë edhe ish-shefi i Hetimeve në Polici, Rrahman Sylejmani.
“Kjo është një fenomen bukur brengosës po them kohëve të fundit permanent, kjo tregon edhe seriozitetin por edhe rrezikshmërinë që ballafaqohen të gjithë zyrtarët policorë gjatë ushtrimit të përgjegjësive dhe detyrave që i kanë në mbajtjten dhe ruajtjen e rendit dhe qetësisë publike, por edhe në parandalimin dhe luftimin e të gjitha dukurive kundër krimit të organizuar por edhe dukurive tjera negative. Kjo tregon që ballafaqimi i tyre në detyrë është tejet me rrisk të lartë”, ka deklaruar ai.
Koloneli në pension, tregon se duhet pritur rezultatin e hetimit për tentim vrasjen e policit në Pejë, e më pas sistemi gjyqësor të jap dënimin maksimal për të dyshuarin.
“Munden zyrtarët policorë me u ndërlidh diçka edhe me ushtrim të funksionit të tyre që e ushtrojnë ata por edhe mund të lidhet diçka me ndonjë problem që kanë në jetën private, spo them që janë këto raste të tilla por ata janë njerëz si të gjithë të tjerët. Kështu që hetimet duhet të tregojnë se cili është motivi. Nëse është motive për shkak të ushtrimit të funksionit të zyrtarëve policorë në terren ajo është një vepër e rëndë penale që duhet edhe Gjykatat edhe Prokuroritë të marrin masa të ashpra”, ka pohuar ai.
Me një rast të ngjashëm zyrtarët policorë u përballen edhe të dielën në fshatin Mramor të Prishtinës, ku disa persona tentuan ti godasin me veturë policët që kërkuan nga ta të ndaleshin në pikë kontrolli.
Kësisoj, efektivët policorë janë detyruar që të shkrepin edhe me armë zjarri ndaj tyre.
