Batanije e veshmbathje, kanë mbetur në vendin ku humbën jetën tre anëtarë të familjes Gashi nga Peja mbrëmjën e së dielës.
Nga aksidenti fatal në rrugën rajonale Mitrovicë – Pejë, në fshatin Çubrel, shihen edhe copëza të automjeteve që u aksidentuan, njëri prej të cilëve ishte veturë zyrtare e Policisë së Kosovës.
Si pasojë e lëndimeve të marra, pesë persona të tjerë janë dërguar në Qendrën Klinike Universitare të Kosovës, katër prej të cilëve zyrtarë policorë.
“Janë trajtuar tek ne, gjendja e tyre ka qenë stabile. Më pas janë dërguar në klinikën e ortopedisë për trajtim të mëtejmë”, ka deklaruar drejtori i Emergjencës, Naser Syla.
Ky aksident, sipas Inspektoratit Policor, dyshohet se u shkaktua nga ana e automjetit të Policisë.
“IPK ka rekomanduar suspendimin e zyrtarit policor i cili ka qenë drejtues i automjetit zyrtar të policisë në momentin e aksidentit përderisa lidhur me aksidentin janë duke u ndërmarrë veprime hetimore në koordinim me prokurorin kompetent. Bazuar në veprimet fillestare hetimore dyshohet se aksidenti ka ndodhur si rezultat i mos përshtatjes së shpejtësisë së lëvizjes së automjetit me kushtet e rrugës nga drejtuesi i automjetit zyrtar të policisë i cili ka kaluar në shiritin e kundërt duke goditur veturën civile”.
Për këtë aksident, një person është nën masën e sigurisë për 48 orë.
“Për këtë rast, është ndaluar një (1) person me vendim të prokurorit për dyzetetetë (48) orë, për veprën penale “Rrezikimi i trafikut publik – me fatalitet”, ka thënë zëdhënësi i Prokurorisë, Valon Preteni.
Për këtë tragjedi, ngushëllime kanë shprehur kryeministri Kurti e kryekuvendari Konjufca.
