Një aksident trafiku ka ndodhur orët e para të së shtunës në Komoran të Drenasit, ku një person ka humbur jetën. Ndërkaq, tre personat e lënduar janë dërguar për trajtim në Qendrën Klinike Universitare, ku është bërë e ditur se të njëjtit janë jashtë rrezikut për jetë.
Ishte nisur në drejtim të Prishtinës nga rajoni i Prizrenit.
Por, një veturë në orët e para të së shtunës u përfshi në një aksident me një kamion që po shkonte në të njëjtin drejtim.
E gjithë ngjarja sipas dëshmitarëve të rastit dyshohet se ndodhi fillimisht në këtë pompë derivatesh në Komoran të Drenasit.
Gjithnjë sipas dëshmitarëve që e panë ngjarjen e që nuk pranuan të flasin para kamerës, shoferi i kamionit dyshohet se nuk e kishte vërejtur që mbrapa e kishte një veturë.
Më pas, ai e tërhoqi veturën e aksidentuar për afro 500 metra deri tek një pikë tjetër e derivateve.
Lajmin e ka konfirmuar edhe Policia e Kosovës, ku bën të ditur se nga aksidenti ka vdekur një person derisa tre tjerë janë lënduar.
“Rreth orës 00:30, policia është njoftuar për një aksident trafiku të ndodhur në rrugën nacionale Pejë-Prishtinë (fshati Komran). Në aksident janë përfshirë dy automjete (një veturë dhe një kamion). Si pasojë e aksidentit një person ka humbur jetën dhe tre të tjerë kanë pësuar lëndime trupore”, thuhet nga Policia e Kosovës.
Ndërkaq, për gjendjen e të lënduarve, për tëvë1 tregoi drejtori i klinikës emergjente, Naser Syla i cili tha se të njëjtit tashmë janë jashtë rrezikut për jetë.
“Është stabile, janë kryer të gjitha egzaminimet e duhura, i kemi observuar në Qendrën Emergjente gjer pas orës 8, mandej do të transferohen në klinikën e Oftalmologjisë dhe Klinikën e Kirurgjisë Maksilofaciale për tretman të mëtutjeshëm”, tha Syla.
Sipas raportit 24-orësh të Policisë, janë regjistruar 72 aksidente trafiku, ku 25 prej tyre kanë qenë me persona të lënduar. /teve1.info/
