Ngrirja e ndihmës që Izraeli ka vendosur në Gaza që nga skadimi i afatit të armëpushimit, ka vënë në rrezik përparimin që punonjësit e ndihmës thonë se kanë bërë për të shmangur urinë gjatë gjashtë javëve të fundit përgjatë fazës së parë të marrëveshjes së armëpushimit që Izraeli dhe Hamasi ranë dakord në janar.
Pas më shumë se 16 muaj lufte, popullsia e Gazës është tërësisht e varur nga ushqimi i transportuar me kamionë dhe ndihma të tjera. Shumica janë të zhvendosur nga shtëpitë e tyre dhe shumë kanë nevojë për strehim. Karburanti nevojitet për të mbajtur në punë spitalet, pompat e ujit, furrat e bukës dhe telekomunikacionin – si dhe kamionët që ofrojnë ndihmën.
Programi Botëror i Ushqimit, agjencia kryesore e ushqimit e OKB-së, thotë se nuk ka rezerva të mëdha ushqimore në Gaza, sepse u përqendrua në shpërndarjen e të gjithë ushqimit të ardhur për njerëzit e uritur gjatë fazës së parë të marrëveshjes. Në një deklaratë për AP, ajo tha se stoqet ekzistuese janë të mjaftueshme për të mbajtur furrat dhe kuzhinat të funksionojnë për më pak se dy javë.
WFP tha se mund të detyrohet të zvogëlojë përmasat e racioneve për t’u shërbyer sa më shumë njerëzve. Ai tha se rezervat e tij të karburantit, të nevojshme për funksionimin e furrave të bukës dhe transportin e ushqimit, do të zgjasin për disa javë nëse nuk plotësohen së shpejti.
Nuk ka gjithashtu asnjë rezervë të madhe tendash në Gaza, tha Shaina Low, këshilltare për komunikim për Këshillin Norvegjez të Refugjatëve. Materialet e strehës që erdhën gjatë fazës së parë të armëpushimit nuk ishin “afërsisht sa duhet për të adresuar të gjitha nevojat,” tha ajo.
“Po të mjaftonte, nuk do të kishim foshnja që vdisnin nga ekspozimi për shkak të mungesës së materialeve të strehimit dhe rrobave të ngrohta dhe pajisjeve të duhura mjekësore për t’i trajtuar ata,” tha ajo.
Të paktën shtatë foshnja në Gaza vdiqën nga hipotermia gjatë fazës së pare të armëpushimit.
Jonathan Crickx, shefi i komunikimit për UNICEF, parashikoi një “rezultat katastrofik” nëse ngrirja e ndihmës vazhdon.
Izraeli thotë se rrethimi synon të ushtrojë presion ndaj Hamasit për të pranuar propozimin e tij për armëpushim . Izraeli ka vonuar kalimin në fazën e dytë të marrëveshjes që arriti me Hamasin, gjatë së cilës fluksi i ndihmave supozohej të vazhdonte. Kryeministri izraelit Benjamin Netanyahu tha të martën se ai është i përgatitur të rrisë presionin dhe nuk do të përjashtojë ndërprerjen e të gjithë energjisë elektrike në Gaza nëse Hamasi nuk lëviz.
