Edhe sasi të vogla të mishit të kuq dhe të përpunuar, siç është një fetë e hollë proshute çdo ditë, janë të afta të rrisin rrezikun e kancerit të zorrëve, sipas një studimi.
Hulumtimi i kryer nga Universiteti i Oksfordit me financim nga OJQ-ja Cancer Research UK përforcon disa përfundime shkencore, siç janë ato të Organizatës Botërore të Shëndetësisë (OBSH), sipas të cilave konsumi i mishit të kuq mund të jetë i dëmshëm.
Studiuesit analizuan të dhënat e pothuajse gjysmë milioni njerëzve që u ofruan vullnetarë për të marrë pjesë në studimin e UK Biobank.
Gjatë hulumtimit të tyre, i cili zgjati më shumë se gjashtë vjet, ata zbuluan se 2,609 njerëz zhvilluan kancer të zorrëve.
Sipas studiuesve, nëse dikush konsumon tre feta proshute çdo ditë, në vend të vetëm një, rreziku i zhvillimit të kancerit të zorrëve rritet me 20%.
Për çdo 10,000 persona që morën pjesë në studim dhe konsumuan 21 gramë mish të kuq dhe të përpunuar çdo ditë, 40 prej tyre u diagnostikuan me kancer të zorrëve, ndërsa për ata që konsumuan 76 gramë çdo ditë, 48 prej tyre u diagnostikuan me kancer të zorrëve.
Organizata “Cancer Research UK” pohon se 5,400 nga 41,804 rastet e kancerit të zorrëve të diagnostikuara çdo vit në Mbretërinë e Bashkuar mund të shmangeshin nëse njerëzit nuk do të hanin fare mish të përpunuar.
Është tregues që Departamenti Britanik i Shëndetësisë këshillon ata që konsumojnë më shumë se 90 gramë mish të kuq dhe të përpunuar çdo ditë ta kufizojnë atë në 70 gramë.
Udhëzimi i NHS-së thotë se ka disa përfitime nga ngrënia e mishit të kuq – për shembull përmbajtja e tij e hekurit dhe proteinave – të cilat duhet të merren në konsideratë kundrejt rreziqeve të mundshme.
Mishi i përpunuar (proshuta, salçiçe, hot dog, sallam) modifikohet për të zgjatur afatin e ruajtjes ose për të përmirësuar shijen e tij. Metodat kryesore të përpunimit janë tymosja dhe trajtimi me kripë, erëza ose konservues.
Mendohet se kimikatet e përfshira në përpunimin e tij mund të rrisin rrezikun e kancerit. Gatimi në temperatura të larta, si në skarë, gjithashtu mund të krijojë kimikate kancerogjene.
Për më tepër, kur bëhet fjalë për mishin e kuq si viçi, derri dhe qengji, ka prova se një nga proteinat (e cila i jep ngjyrën e kuqe) mund të shkaktojë dëmtime në zorrë kur zbërthehet.
Ky është studimi më i madh i kryer në vend lidhur me marrëdhënien midis konsumit të mishit të kuq dhe të përpunuar dhe shfaqjes së kancerit të zorrëve.
