Bekim Salihu nga Instituti GAP ka vlerësuar se, sipas rezultateve të zgjedhjeve për Kuvendin Komunal të Prishtinës, përbërja e Kuvendit do të jetë si më poshtë: LDK 15 ulëse, PDK 12 ulëse, VV 10 ulëse, AAK 7 ulëse, Fehmi Kupina 4 ulëse, ndërsa Nisma, Guxo dhe PSD nga një ulëse secila.
Sipas Salihut, asnjë kryetar komune nuk mund të ndërtojë një qeverisje stabile dhe efektive pa pasur shumicën në Kuvendin Komunal, pasi “janë dhjetëra çështje dhe procedura që ndërlidhen ndërmjet Kuvendit dhe ekzekutivit, ndër të cilat më kryesorja është miratimi i buxhetit dhe planeve sektoriale e kapitale”.
“Nëse fiton Përparim Rama, për të siguruar shumicën e thjeshtë në Kuvend, që nënkupton 26 vota, nuk i mjafton koalicioni me AAK-në dhe tri partitë e vogla (PSD, Guxo dhe Nisma). Pra, atij i duhet ose vota e Fehmi Kupinës, ose një koalicion me ‘elefantët’ (PDK ose VV). LDK mund të llogarisë në një koalicion të lehtë me AAK-në, PSD-në dhe Nismën. Nëse fiton Hajrullah Çeku nga VV, edhe nëse i merr në koalicion Kupinën, AAK-në, Nismën, PSD-në dhe Guxon, prapëseprapë nuk arrin shumicën e thjeshtë, që do të thotë se për një qeverisje eventuale të VV-së në Prishtinë do t’i duhej vota e PDK-së ose e LDK-së. VV, me këtë përbërje të Kuvendit Komunal, favorizohet nga Fehmi Kupina dhe lista Guxo,” ka shkruar ai në Facebook.
