Historiani, Bejtullah Destani ka folur për periudhën e drejtimit të shtetit shqiptar nga mbreti Ahmet Zogu.
Destani thotë se Zogu ishte një prej politikanëve më të zgjuar të historisë moderne shqiptare, teksa shpjegon se si i kishte prishur marrëdhëniet me amerikanët, pasi kishte vendosur për t’ia dhënë koncesionet e naftës Britanisë së Madhe.
“Mbreti Zog ishte ndoshta në historinë moderne të politikës shqiptare, njëri prej politikanëve më të talentuar dhe të zgjuar. Një gjeni për politikë, i jashtëzakonshëm. Ishte shumë i ri kur u bë ministër, shumë i ri kur u bë kryeministër dhe më vonë u bë president dhe ndihma e tij që e përkrahën, ishte nga Britania e Madhe. Ambasadori britanik ishte përkrahësi i tij më i madh edhe për arsye se Ahmet Zogu në atë kohë, para se të bëhej mbret ishte shumë i qartë se në gjithë këtë mes, ekonomia është shumë me rëndësi. Ia dha ky anglezëve koncesionet e naftës, në këtë kohë amerikanët protestuan shumë, bile deshtën t’i prishnin marrëdhëniet diplomatike me Shqipërinë, për arsye se amerikanët ishin shumë të interesuar të marrin koncesionet e naftës në Shqipëri”, thotë Destani.
Destani flet edhe për ardhjen në pushtet të Fan Nolit, për të cilin tha se ishte udhëheqësi i parë që filloi bashkëpunimin me Rusinë bolshevike në ato kohëra.
“Në fillim kishin raporte shumë të mira, bashkëpunuan shumë mirë, por më vonë u ndanë dhe filluan problemet politike mes dy liderëve dhe është shumë i njohur revolucioni i qershorit që filloi me Fan Nolin në krye dhe e larguan me dhunë mbretin Zog i cili shkoi në Jugosllavi. Fan Noli qeverisi për 6 muaj, nuk organizoi zgjedhje të lira, nuk pati përkrahje ndërkombëtare. Shkoi në Lidhjen e Kombeve, mbajti një fjalim. Nuk ishte një fjalim, ishte një tallje gati me Lidhjen e Kombeve…Më e keqja ishte se Fan Noli e pranoi delegacionin rus në Durrës. Shteti shqiptar ishte shteti i parë që e ka pranuar delegacionin rus”, shpjegon Destani në Respublika në Tëvë 1.
Kjo ndikoi thotë ai që ndërkombëtarët ta kthenin Zogun në pushtet.
“Pas dy jave u detyruar që t’i kthejë këta. Noli u largua dhe filluan përgatitjet për kthimin e Zogut. Këtë e vendosën Roma e Londra. Ata më mirë thanë të kemi një Zog ashtu siç është sesa të kemi një qeveri me përkrahjen e bolshevikëve, se ishte një rrezik për të gjithë Evropën”, ka shtuar Destani.
