Kosova ishte kryetemë e mbledhjes së mbrëmshme të Asamblesë Parlamentare të Këshillit të Sigurimit në Nju Jork.
Këtu u diskutua raporti gjashtëmujor për Kosovën.
Përfaqësuesi i Shteteve të Bashkuara të Amerikës, Jeff Bartos, ripërsëriti thirrjen që misioni i UNMIK-ut të mbyllet.
“Normalisht që do duhej ndoshta edhe të shfuqizohej, janë dy mënyra sesi rezoluta mund të shfuqizohet, ose me vendim të Këshillit të Sigurimit ose ajo rezolutë me kohë defaktorizohet dhe më nuk i përshtatet rrethanave për çka është miratu dhe me shfuqizimin e kësaj rezolute do të shfuqizohej edhe UNMIK-u”, është shprehur profesori universitar Avdi Smajljaj.
Megjithatë, profesori Smajlaj tregon se aktualisht një gjë e tillë nuk mund të bëhet, për shkak të së drejtës për VETO nga Rusia dhe Kina.
“Të paktën Këshilli i Sigurimit do duhej bërë përpjekje që të shfuqizonte misionin e UNMIK sepse vërtetë është një mision koti, është një mision i panevojshëm tërësisht, mbi 80 për qind të buxhetit që e merr nga OKB-ja shkon për pagat, dmth tregon vërtetë që për punën të cilën aktualisht UNMIK-u është duke e bërë nuk e di as vetë për çfarë është duke ekzistuar ende në Kosovë dhe vazhdon me atë rutinën e raportimit çdo 6 mujor në Këshillin e Sigurimit”, thotë ai.
Në mbledhjen e së martës, nga Franca iu kërkua Kosovës edhe themelimi i Asociacionit të Komunave me shumicë serbe si hap i domosdoshëm për normalizim të marrëdhënieve mes Kosovës e Serbisë.
Megjithatë, nga Grupi për Studime Juridike dhe Politike nuk shihet se ka rezultate positive në këtë drejtim.
“Kjo u bë në kontekstin e diskutimit të marrëdhënieve mes Kosovës dhe Serbisë ku u bë thirrje për respektim të plotë të Marrëveshjes së Ohrit, pra nga Serbia u kërkua që të mos kundërshtojë anëtarësimin e Kosovës në organizata ndërkombëtare dhe nga Kosova të themelohet Asociacioni dhe fatkeqësisht derisa të ketë një Qeveri me mandat të plotë në Kosovë nuk mund të ketë ndonjë përparim në rrafshin e dialogut mes Kosovës dhe Serbisë”, thotë Besar Gërguri nga GLPS.
Në këtë raportim, përfaqësuesi i Bashkimit Evropian ka thënë se Serbia nuk ka bërë mjaftueshëm për t’i sjellë para drejtësisë autorët e sulmit në Banjskë të 24 shtatorit 2023 ku u vra rreshteri policor, Afrim Bunjaku.
