Shtylla elektrike e cila ndodhet në mes të rrugës ‘’Bashkim Krasniqi’’ në Lipjan po i pengon vozitësit e këmbësorët. Ata kërkojnë zhvendosjen e saj, ndërkaq nga komuna bëjnë të ditur se ende nuk është bërë një zgjidhje teknike nga KEDS-i
Ka pak kohë që është lëshuar për qarkullim.
Por rruga “Bashkim Krasniqi” në Lipjan është “ndarë” më dysh.
Kjo pasi në mes të saj ndodhet shtylla elektrike e KEDS-it.
E për vozitësit e këtij qyteti është e çuditshme se si nuk është hequr nga rruga.
Ata madje e shohin shtyllën si pengesë për të lëvizur në këtë pjesë.
“Qe unë ku e lashë veturën qaty, është normale, pengesë, është pengesë edhe bash interesante qysh se kanë largu. Kanë pasë mundësi bre. Nuk është kjo sot, është vendosë kaherë, pasi që rruga është rregullu është dashtë me zhvendosë prej aty”, thotë qytetari Rrahim Gashi.
Ndërsa për zhvendosjen e saj kërkesë bëjnë edhe këmbësorët.
Mirëpo nga Drejtoria e Infrastrukturës në komunë të Lipjanit thonë se po presin dritën e gjelbër nga KEDS-i për zhvendosjen e saj.
“Ne si komunë kemi bo kërkesë për zgjidhje teknike në KEDS por ende nuk e kemi përgjigjen zyrtare nga KEDS-i. Në momentin që të na kthejnë përgjigje zyrtare KEDS-i, ku të zhvendoset ajo shtyllë, ne si komunë do ta tërheqim atë shtyllë prej atij vendi dhe do ta largojmë në anën e majtë ose në anën e djathtë, varësisht nga zgjidhjet teknike nga KEDS-i. Kërkesën e kemi bërë ditë më parë por ende nuk kemi zgjidhje teknike”, tha Sead Aliu, drejtor i Infrastrukturës në Lipjan.
Tëvë1 ka pyetur KEDS se kur pritet të zhvendoset kjo shtyllë elektrike, mirëpo deri në publikimin e kronikës ky institucion nuk ka kthyer përgjigje.
Shtylla elektrike gjendet në mes të udhës ‘’Bashkim Krasniqi’’ e cila lidhë rrugën ‘’Haxhi Kleçka’’ me rrugën ‘’Hajredin Bajrami’’ dhe ‘’Zylfije Gashi’’.
