U paraqitën në gjykatore pala e akuzuar dhe ajo e dëmtuar.
E në ulësen e organit akuzues, u paraqit një prokurore tjetër, pasi që ajo e rastit është në pushim mjekësor.
Për këtë ndërrim, prokurorja në zëvendësim, Merita Lumezi, që seanca të shtyhet, pasi lëndën e ka marrë me vonesë dhe nuk është e përgatitur.
Kjo u miratua nga trupi gjykues.
Megjithatë, pala akuzuese pati dy propozime.
Mbrojtja e ish kryeshefit të KPM-së, Luan Latifi, i akuzuar për kërkim-marrje ryshfeti nga pronarët e kompanisë “Telkos”, propozoi dëgjimin e dy dëshmitarëve të tjerë.
Këtë propozim e kundërshtoi mbrojtja e pronarëve të kompanisë “Telkos”, duke i cilësuar si jorelevante.
Të dyja propozimet e mbrojtjes së Latifit, u refuzuan nga gjykata.
Seanca tjetër, u vendos të mbahet më 29 mars, kur pritet që të merret edhe vendimi ndaj Latifit.
Aktakuza e ngritur më 15 shtator 2021, ngarkon Luan Latifin se në cilësinë e kryeshefit të KPM dhe Arben Bilalli, në cilësinë e drejtorit të Administratës dhe Financave në KPM, gjatë qershorit 2021, kishin kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “Telkos”.
Pas veçimit të procedurës, Bilalli u dënua me 140 ditë burgim dhe 12 mijë euro gjobë për veprën penale “Marrja e ryshfetit”.
