Një raportim i mediumit gjerman se trupat amerikanë të KFOR-it mund të largohen nga Kosova, ngjalli reagime të shumta.
Por vetë NATO, në një përgjigje për Tëvë1 konfirmoi se vazhdojnë të ofrojnë siguri për të gjitha komunitetet në Kosovë, duke demantuar kështu raportime të tilla.
Në vazhdën e kësaj, Aleanca ushtarake më e fortë në botë bashkë me EULEX-in së fundmi vetëm se kanë shtuar numrin e trupave në vend, me fokus në veriun e Kosovës.
Koloneli në pension, Hysen Gecaj vlerëson se kjo ka të bëjë me mosbesimin e krijuar mes Qeverisë së Kosovës dhe bashkësisë ndërkombëtare.
“Përderisa ata nuk besojnë më në një Qeveri si kjo që e kishim në këtë mandat, ata sigurisht që do të sjellin edhe trupa shtesë, do të përforcojnë atë pjesë sepse nuk duan që siguria të mbetet në duar të pasigurta. Ata duan të binden vetë, në të kalurën ka pasur një koordinim dhe marrëveshje dhe bashkësia ndërkombëtare në atë kohë kur i besonte institucioneve të Kosovës ishte më e relaksuar, ishte prapë se prapë në gjendje të gatishmërisë por jo të jetë drejtpërdrejt me trupa në territorin e caktuar sikur në këtë rast në veriun e Kosovës”, shprehet Gecaj.
Kurse ish-oficeri i forcave ajrore, Ismet Ibishi tregon se kjo nuk nënkupton se ka ndonjë rrezik eventual në aspektin e sigurisë.
“Jemi më shumë se kurdo herë të sigurt, kemi siç e dini edhe tash sigurinë e maksimale me Policinë tonë në veri të Kosovës dhe situata vetëm se do të shkojë duke u stabilizuar dita e ditës. Ju siguroj që asnjë mënyrë nuk mund të rikthehet situata e dikurshme që ka qenë që kishte shqetësime sidomos në pjesën veriore”, thotë Ibishi.
E gjithë vija kufitare që ndan Kosovën me Serbinë, patrullohet nga trupat e KFOR-it në disa vende bashkë me Policinë e Kosovës.
