Ministria e Punëve të Brendshme (MPB), përmes Divizionit për të Huaj, ka njoftuar se nga sot, 9 qershor, ka rifilluar aplikimi për caktimin e termineve për leje qëndrimi për shtetasit e huaj përmes platformës digjitale e-Kosova.
Sipas MPB-së, ky shërbim ka si qëllim lehtësimin e procesit të aplikimit, eliminimin e pritjeve të gjata dhe garantimin e respektimit të të drejtave të shtetasve të huaj që kërkojnë leje qëndrimi në Republikën e Kosovës.
“Kjo mundësi ka për qëllim lehtësimin e procesit të aplikimit për leje të qëndrimit nga shtetasit e huaj, eliminimin e pritjeve të gjata përmes rezervimit të terminit dhe respektimin e të drejtave të shtetasve të huaj”, thuhet në njoftim.
MPB-ja thekson gjithashtu se rezervimi i terminit është i domosdoshëm për të gjithë ata që kërkojnë leje të re qëndrimi apo që dëshirojnë të vazhdojnë lejen aktuale, për të siguruar që respektohen afatet ligjore.
