Ministrja e Arsimit, Arbërie Nagavci, ka bërë të ditur se janë duke shqyrtuar mundësinë për transferimin e mjete për sigurimin e teksteve shkollore.
Sipas obligimit ligjor që ka Ministria e Arsimit, sigurimi i teksteve shkollore për nxënësit do të bëhet në llogari të prindërve.
“Sivjet, jemi duke shqyrtuar mundësinë që transferimin e mjeteve për sigurimin e teksteve shkollore sipas obligimit ligjor të Ministrisë së Arsimit të bëhet në llogari të prindërve, të njëjtit t’i blejnë tekstet për fëmijët e tyre. Shumë shpejtë brenda dy, tre ditëve do të vendoset përfundimisht për këtë udhë që jemi duke e shqyrtuar”, tha ajo në një konferencë për media.
Ajo tha se kanë punuar si ministri në mënyrë që t’i sigurojnë tekste cilësore për nxënësit.
“Ne kemi punuar paralelisht, duke përgatitur platformën për aplikim në kuadër të e-Kosova, në kuadër me të gjitha detajet tjera dhe kemi shqyrtuar të gjitha mundësitë se si t’i sigurojmë që në njërën atë të kemi tekste cilësore për fëmijët, dhe në anën tjetër kujdes për buxhetin e shtetit”, tha ajo.
Nagavci, thotë se kanë pasur rast kur kanë zbuluar se i njëjti tekst që një vit shkollor është shitur 3 euro, pas një viti është shitur me çmimin prej 12 eurove.
“Kemi pa se legjislacioni në fuqi obligon kontratat e negociuara dhe jo rrallë herë kem i parë edhe keqpërdorime dhe abuzime në raste të caktuara dhe të njëjtat i kemi adresuar. Ka pasur dallime tejet të mëdha të çmimeve të teksteve shkollore, kemi pasur jo vetëm dallim nga viti në vit dhe rritje të çmimit, por edhe dallime që për tekstet e së njëjtës klasë nga shtëpitë e ndryshme botuese. Madje, kemi pasur edhe një rast që veçse e kemi adresuar te organet kompetente te hetuesisë, ku i njëjti tekst që një vit është shitur me çmimin diku prej 3 eurove në vitin vijues na është shitur diku mbi 12 euro”, tha ajo.
Tutje, Nagavci ka shprehur besimin se librat do të jenë të gatshme deri më 1 shtator, ndërsa nuk e ka përjashtuar mundësinë e vendosjes së çmimeve tavan edhe për librat shkollor, raporton teve1.info
Zëvendësministri i Arsimit, Taulant Kelmendi, ka thënë se çmimet e ofruara nga shtëpitë botuese janë të papërballueshme për buxhetin e MASHT-it.
“Shtëpitë botuese nuk pasur mirëkuptimin për uljen e çmimeve. Për ne është e papërballueshme. Libri shoqëria dhe mjedisi i klasës së tretë bashkë me fletoren e punës kap shifrën 27 euro… Jemi duke shqyrtuar mundësinë që mjetet për blerjen e librave të kalojnë tek prindërit. Brenda dy tri ditëve do të lëshojmë linkun për aplikim përmes e-Kosova”, tha ai./teve1.info/
