Ka më shumë se gjysmë shekulli që është e ndërtuar.
Por, shtëpia e familjes Paloka nuk është prej te zakonshmeve.
Themelet e saj u nisën në vitet e 70 për nevojat e familjes Paloka në Gurrakoc të Istogut, që vite me vonë do të shërbente për çështje politike e arsimore ne vend.
Brenda hapësirave të kësaj shtëpie, mësuan nxënësit e gjimnazit të Istogut në vitet e 90-ta.
Kthimi i kësaj shtëpie, në shkollë ku do të mbahej mësimi paralel pas mbylljes së shkollave shqipe në Istog, bënë që familja Paloka të ishte çdo herë nën vëzhgimin e policisë serbe.
Që familja Paloka ishte e kërcënuar vazhdimisht, e thotë edhe familjari i Lush Palokës, Gjergj Paloka.
E jo vetëm për familjen, mbajta e mësimit në këtë shtëpi shkollë, ishte shumë e vështirë edhe për mësimdhënësit.
Prapa mureve të kësaj shtëpi fshihen edhe histori të formimit të partive politike në Istog e organizatës humanitare “Nënë Tereza”
Por kjo shtëpi së shpejti mund të shembët, dhe bashkë më të zhduket edhe historiku i saj.
Nga Komuna e Istogut thonë se nuk kanë pranuar kërkesë zyrtare, nga Lush Paloka, por kanë në plan renovimin e saj.
“Ne nuk kemi pranuar ndonjë kërkesë zyrtare nga z. Lush Paloka, megjithatë jemi në kontakt të vazhdueshëm me të dhe jemi angazhuar në mënyrë që të gjejmë zgjidhjen e duhur për renovimin e kësaj shtëpie. Tashmë ne jemi në fazën e identifikimit të vendndodhjeve të ‘Shtëpive-Shkolla’ në tërë territorin e Komunës tonë dhe posa të përfundojmë këtë proces do të dalim një zëri për të gjitha shtëpitë-shkolla të cilat kanë shërbyer për mbajtjen e procesit mësimor në vitet e 90-ta”, thotë zyrtari për informim Ardon Arifaj.
Familja Paloka e ka në plan që në themelet e saj të ndërtojë një shtëpi për nevojat e tyre.
