Dy katet e kësaj shtëpie në Rahovec janë bërë shkrumb e hi.
Të shtunën mbrëma, objekti i banimit u përfshi nga flakë të intensitetit të lartë.
“Informatën e kemi marr nga zjarrfikësit në ora 22:20. Kemi intervenuar shumë shpejt. Intervenimi ka zgjat deri në ora 02:10 minuta. Ndihmë kemi thirr, Malishevën edhe Gjakovën”, ka thënë nënkoleni i zjarrfikësve në Rahovec, Neki Kollari.
Neki Kollari, shef i ndërrimit të zjarrfikësve në Rahovec, tregon se gjatë intervenimit hasën në disa vështirësi.
“Jo nuk ka pasur të lënduar por zjarri ka qenë katastrofë, u bë shkrumb e hi sikur siç po shihet. Shtëpi të dendura shumë ka qenë problem për intervenim por ia kemi dal. Kemi pas raste të tilla, por ky kësaj radhe është i veçantë. Shumë shtëpi ndërmjet vetë të ngushta me një oborr 4-5 shtëpi, e shtëpi të vjetra”, thotë ai.
Familja pesë anëtarshe që banonte këtu, deri në rregullimin e kësaj shtëpie janë detyruar të shpërngulen diku tjetër.
Ndërsa për rastin disa detaje i kanë dhënë edhe në Policinë e Kosovës.
“Raportohet se në rrethana të pa njohur në zjarr është përfshirë shtëpia e ankuesit mashkull kosovar, ndërsa nga zjarri është përfshirë edhe kulmi i një shtëpie tjetër afër saj me ankues mashkull kosovar. Zjarrfikësit kanë shuar zjarrin. Nuk raportohet për të lënduar”, thuhet nga Policia e Kosovës.
Shkaktarët e rastit janë duke u hetuar nga inspektorët kundër zjarrit.
