Izraeli ka rënë dakord për pauza katërorëshe humanitare çdo ditë në veri të Gazës duke filluar nga e enjtja.
Kështu njoftoi Shtëpia e Bardhë, ndërsa presidenti Joe Biden po u bën presion izraelitëve për një ndalesë disaditore të luftimeve në një përpjekje për të liruar pengje të mbajtura nga Hamasi.
I pari i Amerikës tha se për momentin nuk kishte asnjë mundësi për një armëpushim zyrtar dhe se “kishte marrë pak më shumë” sesa shpresonte nga Izraeli për pauzat humanitare.
“Po, kam kërkuar një pauzë tre-ditore. Kam kërkuar edhe një pauzë më të gjatë për disa prej tyre”, tha Biden.
Administrata e Bidenit njoftoi gjithashtu se Izraeli po hapte një korridor të dytë për civilët palestinezë që të largoheshin nga zonat që janë fokusi aktual i luftimeve kundër Hamasit.
Biden i kërkoi kryeministrit izraelit, Benjamin Netanyahu, që të vendoste pauza ditore gjatë një bisede telefonike që zhvilloi me të në fillim të kësaj jave.
Lufta mes Izraelit dhe Hamasit u nxit pasi ky grup militant palestinez më 7 tetor sulmoi jugun e Izraelit duke vrarë 1.400 persona dhe duke marrë pengje mbi 200 të tjerë.
Që atëherë, Izraeli ka sulmuar nga toka dhe ajri Rripin e Gazës, që është shtëpi e 2.3 milionë palestinezëve.
