Ky muaj siç është paralajmëruar do të ketë një ofensivë diplomatike të madhe mbi Kosovën dhe Serbinë, me qëllim të zbatimit të marrëveshjes për normalizim marrëdhëniesh mes dy shteteve.
Një numër i madh i vizitave dhe takimeve të niveleve të ndryshme janë të parapara të ndodhin gjatë muajit shtator, që mendohet se do të shërbejnë edhe për progres në procesin e dialogut.
Njohësi i çështjeve politike, Arton Demhasaj, thotë se përveç presionit të paralajmëruar, do të ketë edhe një angazhim më të madh të SHBA-së, Francës e Gjermanisë.
Ka me pas një kthim të presionit edhe ndaj Kosovës dhe ndaj Serbisë dhe sa i përket presionit të dialogut dhe zbatimit të marrëveshjes së Brukselit, por njëkohësisht edhe sa i përket Kosovës pra, shtensionimi dhe gjetja e një zgjidhje për situatën në veri … Normalisht që tash do të ketë presion edhe më të madh edhe involvim më të madh edhe të Francës dhe të Gjermanisë, pa e mohuar asnjëherë edhe involvimin amerikan që ajo marrëveshje që është arritur në Bruksel të filloj të zbatohet nga ana e të dy shteteve.
Ndërsa profesori Universitar, Dorajet Imeri thotë se pavarësisht presionit, nuk mund të ketë përparim në dialog, pa u mbajtur zgjedhjet në komunat veriore.
Bashkësia ndërkombëtare në vazhdimësi ka akuzuar palët për moszbatimin e marrëveshjes për normalizim, ndërsa në takimin e radhës në kuadër të dialogut, palët pritet të diskutojnë edhe për planin e sekuencimit.
