Deri më tani janë arrestuar 7 persona lidhur me rastin e grupit Albkings.
Këtë e ka konfirmua Prokuroria Themelore e Prishtinës në një konferencë për media.
Kryeprokurori, Zejnullah Gashi tha se ka gjasa që të zgjerohen hetimet dhe personave që do të ndiqen.
“Falë bashkëpunimit të ngushtë me qytetarët e Republikës së Kosovës kemi arritur që këtë rast delikat sa i përket identifikimit të kryerësve të veprës penale, kemi arritur t’i arrestojmë brenda një afati të shkurtër kohor dhe ky rast si i tillë, target i së cilës kanë qenë qytetarët e Republikës së Kosovës, duke cenuar rëndë integritetin moral të tyre sa i përket shpërndarjes së fotove, video-incizimeve intime të cilat kanë krijuar pasiguri tek qytetarët e Republikës së Kosovës. Sot i kemi diku 7 persona të cilët i kemi në ndalim dhe jemi në fazën tjetër të vazhdimit edhe të zgjerimit të hetimit edhe për personat tjerë”, ka thënë Gashi.
Ndërsa, zëvendëskryeprokurorja, Elza Bajrami-Kastrati, tha se në mesin e të arrestuarve është edhe një grua.
“Me 23 prill, është ndaluar edhe personi i dytë i gjinisë femër, me inicialet E.S e cila po ashtu, duke qenë njëra nga administratoret e këtij grupi, dyshohet për veprën penale në bashkëkryerje vjedhja e identitetit dhe kredincaleve nga neni 277 i ligjit për ndryshimin dhe plotësimin e kodit penal. Pra së bashku me të pandehurin e parë si dhe persona të tjerë edhe ndaj kësaj të pandehure Prokuroria ka paraqitur kërkesë për caktimin e masës së paraburgimit ku i është vazhduar edhe për dy muaj të tjerë nga gjykata”, është shprehur ajo.
Ajo theksoi se Prokuroria Themelore në Prishtinë është duke hetuar edhe në pista tjera këtë rast.
Grupi Albkings ishte i njohur për intimidim, shqetësim e ngacmim të grave e të vajzave në platformën Telegram.
