Shërbimi Spitalor dhe Klinik Universitar i Kosovës (ShSKUK) ka njoftuar se javën e ardhshme do të fillojë shpërndarja e pajisjeve ndihmëse për personat me paraplegji dhe tetraplegji, pas përfundimit të procesit të aplikimit dhe vlerësimit nga komisionet përkatëse.
Sipas ShSKUK-së, “është përgatitur plani i veprimit për furnizimin me pajisje ndihmëse për personat paraplegjikë dhe tetraplegjikë”, pas kompletimit të aplikacioneve dhe përfundimit të vlerësimeve.
“Bazuar në renditjen, sipas radhës së aplikimit, në fillim të javës së ardhshme do të nisë shpërndarja e pajisjeve të para për përfituesit”, thuhet në reagimin zyrtar të ShSKUK-së.
Montimi i pajisjeve do të realizohet nga profesionistë të fushës, ndërsa për disa përfitues, montimi do të bëhet në ambientet e shtëpive të tyre. Kjo me qëllim “të garantimit të përdorimit sa më efikas dhe të sigurtë të tyre”, sqaron ShSKUK.
Shërbimi shëndetësor ka theksuar gjithashtu se të gjithë ata që janë kualifikuar përmes vlerësimit do të marrin pajisjet përkatëse. “Të gjithë aplikuesit që kanë kaluar vlerësimin e komisionit do të pajisen me pajisjet ndihmëse dhe nuk ka nevojë të kenë shqetësime për këtë proces”, bëhet e ditur në njoftim.
Ndërkohë, për personat që nuk kanë arritur të aplikojnë deri më tani, mbetet ende mundësia për ta bërë këtë. “Personat që nuk kanë aplikuar për përfitim të këtyre pajisjeve do të kenë mundësi që aplikimin ta bëjnë në zyret e komisionit, në ndërtesën e ambulancave specialistike në QKUK, kati i dytë”, thuhet në fund të njoftimit.
