Shqiptarët mund të mbesin pa asnjë deputet në Kuvendin e Serbisë. Nga Qeveria e Kosovës thonë se ky rezultat jo i kënaqshëm erdhi si pasoj e pasivizimit të adresave të rreth 6.000 shqiptarëve nga ana e autoriteteve të Serbisë. Në anën tjetër politikani serb, Çedomir Jovanoviq për Tëvë1 e ka quajtur si trishtuese mungesën e prezencës së shqiptarëve në parlamentin e Serbisë.
Në legjislaturën e fundit në Serbi, një zë i vetëm i përfaqësonte shqiptarët.
Ai ishte Shaip Kamberi.
E kësaj radhe gjasat janë të mëdha që shqiptarët të mbesin pa asnjë ulëse në Parlamentin e Serbisë.
Mungesa e minoriteteve në Parlament, nuk po e shqetëson presidentin serb, Aleksandar Vuçiq, i cili ditë më parë fitoren e tij e quajti të pastër dhe të bukur.
Por, politikani Çedomir Jovanoviq, për Tëvë1 thotë se mungesa e përfaqësimit të shqiptarëve në parlamentin serb është një gjë e trishtueshme për Serbinë.
“Unë mendoj se është shumë e trishtueshme mungesa e shqiptarëve në parlamentin e Serbisë, me të vërtetë është për keqardhje”, tha Jovanoviq.
Shqetësuese nga analisti Imer Mushkolaj po shihet edhe heshtja e Bashkimit Evropian lidhur me fshirjen e adresave të shumë shqiptarëve të Luginës së Preshevës, të cilëve iu pamundësua e drejta e votës.
Se shqiptarët janë populli më i diskriminuar në Serbi e thotë edhe analisti politik Ognjen Gogiq.
“Siç duket nuk do te ketë asnjë përfaqësues shqiptar në Parlament. Vlerësoj e është shumë e rëndësishme për demokracinë që te ketë zëra të ndryshëm opozitar siç ishte Shaip Kamberi. Ndjej keqardhje për situatën e shqiptarëve ne Preshevë e Bujanoc, ata janë më të shkelurit në Serbi. Imazhi i Serbisë është i dëmtuar tash e sa kohë”,vlerësoi Gogiq.
E nga Qeveria e Kosovës deklarojnë se rreth 6000 shqiptarëve atje u janë pasivizuar adresat e banimit duke ua pamundësuar të drejtën e votës.
“Në Preshevë, Medvegjë dhe Bujanovc po ndodhë një spastrim etnik administrativ mbi baza kombëtare. Rreth 6000 shqiptarëve atje u janë pasivizuar adresat e banimit duke ua pamundësuar të drejtën e votës. Kjo është një padrejtësi e madhe. Padyshim që rezultati jo i kënaqshëm i këtyre zgjedhjeve për shqiptarët vjen edhe për shkak të kësaj forme administrative të spastrimit etnik”, tha Përparim Kryeziu, zëdhënës i Qeverisë së Kosovës.
Televizioni ka pyetur Bashkimin Evropian lidhur me diskriminim që po u bëhet shqiptarëve në Serbi, por nga blloku evropian kanë refuzuar të kthejnë përgjigje.
Raporti i gazetarit Shpat Blakçori.
