Pamundësia për të arritur marrëveshje për targat e dokumentet e hyrje-daljes, i solli në Kosovë emisarin e BE-së, Miroslav Lajçak, e atë të ShBA-së, Gabriel Escobar.
Përveç takimeve me liderë politikë në vend, dyshja i dëgjoi edhe politikanët e Listës Serbe, partisë më të madhe të komunitetit serb në Kosovë.
Lidhur me atë që u bisedua, shumë pak u bë e ditur.
E takim me emisarët po kërkojnë edhe politikanët shqiptarë nga Lugina e Preshevës pasi konsiderojnë që çështja e tyre duhet të përfshihet në marrëveshjen përfundimtare.
“Shqiptarët e Luginës së Preshevës në vazhdimësi kanë kërkuar që të jenë pjesë e tryezës së dialogut, kanë kërkuar që të jetë temë e trajtuar në kuadër të këtij procesi sepse konsiderojmë që në fund aspiratat e shqiptarëve të Luginës do të duhej të realizohen në kuadër të një marrëveshje gjithëpërfshirëse e që nënkupton të mos ketë probleme në vendosjen e një paqe të qëndrueshme”,ka thënë Ragmi Mustafi – kryetar i Këshillit Kombëtar Shqiptar në Luginën e Preshevës.
Por cilat janë problemet e Luginës që kërkojnë zgjidhje urgjente?
“Sigurisht është pasivizimi i adresave të qytetarëve shqiptarë, diskriminimi i cili në mënyrë sistematike dhe strukturore që po bëhet të ndërprehet, krahas kësaj sigurisht të rikthehen adresat dhe t’i shpaguhet dëmi të gjithë atyre që i është pamundësuar në këtë fazë përmes diskriminimit dhe njohja e diplomave që ka qenë pjesë e dy marrëveshjeve”, ka shtuar ai.
Nga Lëvizja Vatra vlerësojnë se një takim i emisarëve me politikanët e Luginës do të ishte e pamundur për shkak të mosunifikimit të spektrit politik atje.
“Lajçak dhe Escobar mund t’i takojnë lehtë serbët e Kosovës pasi ata janë të përfaqësuar nga një parti politike siç është ajo Lista Serbe kurse në Kosovë Lindore kanë të bëjnë me një numër të madh partish dhe do të jetë e pamundur që t’i takojë fizikisht 20-30 vet dhe të merret vesh me ta. Por që politikën apo interesat e shqiptarëve të Kosovës Lindore në arenën ndërkombëtare duhet t’i përfaqësojë ministria e Punëve të Jashtme të Kosovës dhe të Shqipërisë”, është shprehur Kushtrim Kadriu nga Lëvizja Qytetare ‘Vatra’.
Ndryshe Qeveria në kornizën e përgjithshme të marrëveshjes finale me Serbinë, ka vendosur edhe kapitullin ku propozohet trajtim i të drejtave të pakicave.
Kronika e gazetarit Gojart Jashari.