Këshilli i Ministrave në Shqipëri ka vendosur të mërkurën shtyrjen deri në vitin 2027, të pjesëmarrjes së Forcave të Armatosura të Shqipërisë në operacionin ushtarak ndërkombëtar KFOR në Kosovë.
Në mbledhjen e mbajtur, Këshilli i Ministrave miratoi disa ndryshime në vendimin “për pjesëmarrjen e Forcave të Armatosura të Republikës së Shqipërisë në operacionin ushtarak ndërkombëtar KFOR në Kosovë”.
Konkretisht, u vendos kohëzgjatja e këtij misioni nga 31 dhjetor 2024 në 31 dhjetor 2027.
Gjithashtu në vendim ndryshon edhe dieta për ditët e qëndrimit, pasi nga rreth 60 euro në ditë shkon në 120 euro në ditë, përveç pagës mujore.
Vendimi parashikon se periudha e qëndrimit në mision për çdo përfaqësues do të jetë me sistem rotacioni çdo 6 muaj dhe 1 vit për postin ACOS SPT, periudha, të cilave u shtohen edhe ditët e qëndrimit për ndërrimin me kontingjentin e radhës (marrje dhe dorëzim detyre, vonesa të transportit strategjik).
Efektet financiare, që rrjedhin nga zbatimi i këtij vendimi, përballohen nga buxheti i Ministrisë së Mbrojtjes të Shqipërisë. /ATSH
