Për të gjashtin vit radhazi, qeveria shqiptare ka mbështetur mësimin e gjuhës shqipe në diasporë dhe në komunitetet shqiptare jashtë vendit duke shpërndarë 117.138 tekste falas në total për nxënësit shqiptarë në shkolla dhe kurse të gjuhës amtare.
Lajmin e bëri të ditur sot, ministrja për Evropën dhe Punët e Jashtme, Elisa Spiropali, ndërsa përshëndeti rolin aktiv të Këshillit Koordinues të Diasporës, në kultivimin dhe përhapjen e gjuhës, kulturës dhe traditave më të mira shqiptare.
Spiropali vlerësoi angazhimin e modeles së njohur shqiptare, Emina Çunmulaj, anëtare e Këshillit Koordinues të Diasporës, në këtë proces.
Spiropali lajmëroi po ashtu mbledhjen e një tjetër samiti të Diasporës, raporton ATSH.
“Ndërkohë, bëhemi gati për një tjetër Samit të suksesshëm të Diasporës së shpejti, ku do të mirëpresim kontribute duke synuar forcimin e bashkëpunimit dhe shkëmbimin e përvojave që nxisin angazhimin e diasporës shqiptare në zhvillimin e vendit”, u shpreh ajo.
Qeveria shqiptare është angazhuar për shtrirjen e programit të mësimit të gjuhës shqipe për fëmijët e diasporës drejtpërdrejt me mësues, por edhe me një aplikacion të posaçëm.
