Këtë e ka bërë të ditur kryetari i LDK-së, Lumir Abdixhiku, i cili ka thënë se Pantina pasuron këtë parti.
“Shqipe Pantina nga sot është pjesë e Lidhjes Demokratike të Kosovës. Ajo i bashkohet shtëpisë sonë politike si një profesioniste me përvojë të shquar në jetën publike. Jam jashtëzakonisht i lumtur për ardhjen e Shqipes në LDK. Ajo përveç se pasuron radhët tona politike, vazhdon ciklin e bashkëngjitjeve që anëtarë të jetës publike, politike, medias e shoqërisë civile po e bëjnë me LDK-në. Lidhja Demokratike e Kosovës sot është bërë adresa e vetme e profesionistëve të tillë. Nga këtu, kështu, e kemi për obligim t’i ofrojmë qytetarëve të vendit platformë politike të denjë për rrugëtimin e ardhëm që Kosova e meriton”, ka shkruar ai.
E anëtarja e më e re e LDK-së, ka thënë se ka qenë e nderuar me ftesën që i është bërë nga kryetari i kësaj partie.
Ajo ka thënë se kjo parti sot është bërë adresë nga shumë njerëz për të dhënë kontributin për një të ardhme më të mirë.“Ndihem e nderuar me ftesën e kryetarit Lumir Abdixhiku të bëhem pjesë e Lidhjes Demokratike të Kosovës. Angazhimi im në politikë çdoherë ka pas synim gjetjen e zgjidhjeve për problemet me të cilat përballet vendi ynë, andaj edhe e kam pranuar ketë ftesë dhe kam vendosur të i kthehem sërish politikës aktive. LDK sot është bërë adresë ku shumë veprimtarë politikë, të reja e të rinj që duan të kontribuojnë për një të ardhme më të mirë për vendin, familjen dhe veten e tyre, po i bashkohen kësaj partie”, ka shkruar ajo.
Pantina ishte pjesë e Kuvendit të Kosovës. Në periudhën 2014-2017, ishte pjesë e Lëvizjes Vetëvendosje, ndërsa 2017-2019, pjesë e Partisë Socialdemokrate, ku bashkë me një disa deputetë ishin larguar nga VV-ja.
Pantina para se të hyjë në politikë ka qenë pjesë e shoqërisë civile, ndërsa së fundi ishte se komentatore e zhvillimeve politike. /teve1.info/
