Politikani opozitar serb, Djordje Miketiq, në një intervistë dhënë për tëvë1 thotë se zgjedhjet në Serbi nuk kanë qenë të lira dhe demokratike. Ai thotë se qytetaret do të protestojnë derisa të ketë një proces të rregullt zgjedhor. Edhe nga blloku evropian kanë ngritur shqetësime për mbarëvajtjen e procesit zgjedhor në Serbi.
Plotë parregullsi dolën në pah nga zgjedhjet serbe të 17 dhjetorit.
E për shkak të shumë problemeve me procesin zgjedhor në Serbi, ka reaguar edhe Bashkimi Evropian.
Nga blloku evropian presin që autoritetet serbe t’i shqyrtojnë në mënyrë transparente raportet e besueshme për parregullsi në zgjedhjet e mbajtura më 17 dhjetor.
E i pakënaqur me procesin zgjedhor është shprehur edhe politikani opozitar Djordje Miketiq.
Ai konsideron se zgjedhjet janë vjedhur në Serbi.
“Nëse i analizoni mirë rezultatet zgjedhore, ju mund ta shihni se Partia Progresive Serbe nuk ka pasur edhe aq rezultate të mira siç po paraqiten në publikë. Madje në shumë komuna në Serbi, janë bërë disa ndryshime pozitive dhe ka një opozitë më të fortë. Por duhet thënë se në këto zgjedhje ka pasur edhe shumë parregullsi. Me dokumente të dyshimta kanë ardhur shumë qytetarë nga vende të tjera për të votuar, një numër i madh i tyre kanë votuar në Beograd duke e bërë kështu diferencën. Këtë nuk po e them vetëm unë, por po e thonë vëzhguesit e shumtë ndërkombëtar. Pra me pak fjalë ishte një fitore e vjedhur e tyre”, tha Djordje Miketiq-politikan opozitar.
Megjithatë, Djordje Miketiq, ka paralajmëruar protesta derisa të krijohen kushtet për zgjedhje lira dhe demokratike në Beograd.
“Megjithatë ne nuk do dorëzohemi, do të vazhdojmë me protesta deri sa të ketë zgjedhje të reja dhe të lira në Beograd. Përveç partive opozitare, me mijëra qytetarë të rinj dhe studentë i kanë mbushur sheshet e Beogradit duke kërkuar zgjedhje të reja. Kur i sheh gjithë ata njerëz në rrugë me të vërtetë kam shumë shpresë për ardhmen. Ne kemi një periudhë të gjatë që që jemi duke protestuar vazhdimisht kundër këtij regjimi”, u shpreh Miketiq.
Tutje, politikani serb është shprehur i shqetësuar për rënien e demokracisë në Serbi.
Sipas tij regjimi aktual kontrollon gjithçka në Serbi, duke filluar me mediet dhe me policinë.
“Që nga viti 2012 ka rënie të demokracisë në Serbi dhe institucionet janë dobësuar. Por ne historikisht kemi pasur probleme me demokracinë, ndonjëherë qëndrojmë më mirë ndonjëherë jemi më keq. Por ky regjim i ka tejkaluar limitet, sepse vetëm mund ta shihni se sa e frikshme është propaganda e medieve këtu dhe kontrolli që ushtrohet mbi policinë. Është me të vërtetë për keqardhje sepse policia po instrumentalizohet nga partia në pushtet. Pra nga viti në vit Serbia po bëhet me autoritare me udhëheqjen e partisë në pushtet. Ne jemi shteti me demokracinë më të brishtë në rajonin e Ballkanit Perëndimor”, deklaroi politikani Miketiq.
Sipas rezultateve preliminare të Komisionit Republikan Zgjedhor, lista zgjedhore “Aleksandar Vuçiq – Serbia nuk guxon të ndalet” ka fituar 46.71 për qind, kurse e dyta është lista “Serbia kundër dhunës” me 23.58 për qind.
