Kryetari i Komunës së Zubin Potokut, Izmir Zeqiri, tha se pasojat janë të mëdha pas sulmit që ka ndodhur mbrëmjen e sotme në fshatin Varagë të Zubin Potokut, me ç’rast është dëmtuar kanali i ujit të Ibër-Lepencit.
Ai tha se ekipet e terrenit janë në vazhdimësi aty dhe po e vëzhgojnë situatën.
“Pasojat janë të mëdha. Ekipet janë në vazhdimësi në terren, si policia, si zjarrfikësit, si ekipet teknike dhe ato Ibër-Lepencit që do ta bëjnë vlerësimin e dëmit, gjithashtu ta shohin se a mund të sanohet dhe për sa kohë merr sanimi. Ka pasoja edhe me ndaljes së ujit të pijshëm për disa komuna”, tha ai në emisionin “Info Nata” në Tëvë1.
Tutje, ai shpërthimet e fundit që kanë ndodhur, përfshirë edhe sulmin me granata në objektin e Komunës së Zveçanit i sheh si përpjekje për destabilizim të veriut.
“Unë e shoh si përpjekje për destabilizim të veriut, ani pse situata mund të konsiderohet dhe është nën kontroll. Mirëpo, janë një pjesë e dëshmive që kemi individë që përpiqen me kësi akte të dëmtojnë procesin, rendin dhe ligjin në këto zona”, deklaroi ai.
Lidhur me shpërthimet në veri, tashmë konferencë për media ka thirrur edhe kryeministri, Albin Kurti.
Ai para qytetarëve do të adresohet rreth orës 23:30.
