Radha i erdhi pothuajse në përfundim të orarit të punës.
Është ky vetëm njëri nga automjetet që të premten arriti ta kryente kontrollin teknik në Mitrovicën Veriore.
E dhjetëra të tjerë këtij procesi iu nënshtruan gjatë të premtes.
Krejt kjo para se përfundimisht t’i konvertojnë targat ilegale në ato të Republikës së Kosovës.
Por, fluksin e madh të makinave që po vijnë këtu, dikush tentoi ta pengonte të mërkurën mbrëma. Pikërisht në hyrje të kësaj kontrolle teknike hodhi një granatë dore.
Nga qendra e kontrollit teknik të automjeteve në Mitrovicë të Veriut, nuk kanë pranuar të prononcohen për media.
Ndërkohë, detaje për këtë rast dha zëvendësdrejtori i policisë në veriun e Kosovës, Veton Elshani.
“Para orës 12 të natës, ka ndodh një shpërthim nga një granatë dore është hedhur e tipit M75 e cila ka shkaktuar dëme të vogla materiale, nuk ka pas dëmë në njerëz. Qendra e kontrollit teknik vazhdon punën në mënyrë të rregullt”, tha Elshani.
Por, sipas Elshanit kjo nuk i frikësoi qytetarët serbë.
Vetëm të premten afër 100 automjeteve iu kthyen targat në RKS.
“Numri total prej 1 nëntorit e deri sot është 1 mijë 854. Duke marrë parasysh edhe 850 vetura të cilat janë regjistruar nder vite, atëherë numri i përgjithshëm i konvertimit të targave ka shkuar në mbi 2 mijë e 500”, tha ai.
Ndryshe, afati për konvertimin e targave nga ato ilegale në RKS, përfundon me 1 dhjetor.
