Policia e Kosovës ka bërë të ditur se pas një zjarri në një kodrinë në Vushtrri është dëgjuar edhe një shpërthim.
Sipas raportit 24-orësh të Policisë, në vendin e ngjarjes menjëherë kanë dalë njësitë policore dhe zjarrfikësit, të cilët kanë arritur të lokalizojnë zjarrin.
Gjatë ekzaminimit të terrenit është vërejtur një gropë, brenda së cilës janë gjetur disa pjesë armësh dhe municioni, përfshirë dy karikatorë armësh, disa këllëfë, një shufër metalike si dhe municion të ndryshëm.
Me urdhër të prokurorit të rastit, rasti është iniciuar dhe hetimet janë duke vazhduar për të zbardhur rrethanat e ngjarjes dhe origjinën e armëve të gjetura.
“Pas raportimit lidhur me një zjarr në një kodrinë është dëgjuar një shpërthim-detonim. Në vendin e ngjarjes kanë dalë njësitë policore dhe zjarrfikësit që e kanë lokalizuar zjarrin. Gjatë shikimit të vendit të ngjarjes është vërejtur një gropë ku janë gjetur edhe disa pjesë të armëve dhe municionit si: dy karikatorë të armëve, disa këllëfë të armëve, një shufër metalike dhe municion i ndryshëm. Në konsultim me prokurorin është iniciuar rasti dhe mbetet në hetime”, thuhet në raportin 24-orësh të Policisë. /teve1.info/
