Xhamat e thyer janë ende në tokë. E njësitë relevante po i mbledhin shiritat e vendosur që në mëngjes.
Kjo për shkak të dyshimit për shpërthim të një granate dore në lagjen “Dardania” në Prishtinë.
Përveç dëmtimit të tri veturave, nuk pati asnjë të lënduar.
Këtë e konfirmoi zëdhënësi i Policisë për Rajonin e Prishtinës, Agron Borovci.
“Policia menjëherë ka dalë në vendin e ngjarjes, dhe nga informacionet e para dyshohet që ngjarja të ketë ndodhur rreth orës 03:00, ndërkohë që nuk raportohet për të lënduar. Dëmet materiale dyshohet të kenë ardhur si pasojë e shpërthimit të mjetit shpërthyes që dyshohet të jetë granatë dore”, tha ai.
Aktualisht policia ka nisur ndërmarrjen e veprimeve hetimore për sqarimin e plotë të rrethanave që karakterizojnë ngjarjen.
Raporti i gazetares Albiona Hajdari.
