Një shpërthim ndodhi në orët e para të së dielës në komunën e Zveçanit. Cak i këtij sulmi ishte vendi ku më herët ishte e vendosur një kompani serbe e derivateve Nga Policia e Kosovës thonë se pati vetëm dëme materiale dhe janë në hetime, në vendin e ngjarjes doli edhe kryetari i kësaj komune për të dënuar një akt të tillë.
Në orët e para të së dielës, në afërsi të qendrës së Komunës së Zveçanit ndodhi një shpërthim.
E cak i këtij sulmi ishte kjo pompë derivatesh.
Më herët në këtë pompë ishte e vendosur një kompani serbe e derivateve.
E nga ky sulm pati dëme vetëm materiale në pompë, në disa lokale dhe veturat përreth.
Pronari i njërit nga lokalet e dëmtuara, Nebojsha Ristoviq tha se nuk ka qenë në shtëpi kur ka ndodhur sulmi.
“Ne nuk jemi të lirë. Unë nuk kisha folur më shumë… Ka pasur këtu sigurim, nuk kam qenë këtu, për një moment çka ka ndodhur nuk di dhe as nuk mund të supozoj…Çka dhe si mund të dyshoj unë, por dihet këtu kush e mban sigurinë. Këtu është dashur të mbajnë sigurinë Kombet e Bashkuara, por fatkeqësisht sigurinë këtu e mbajnë ata që ju të gjithë e dini”, tha Nebojsha Ristoviq, pronar i lokalit.
Policia e Kosovës ka filluar hetimet për zbardhjen e rastit.
“Nga ky shpërthim nuk ka të lënduar, ndërsa ka pas dëme materiale në shtëpizën e pompës së benzinës dhe disa vetura në afërsi. Nuk mund të themi ende se çka e ka shkaktu këtë shpërthim, ndërsa njësitet përkatëse janë në vendin e ngjarjes”, tha Elshani.
Në vendin e ngjarjes përveç Policisë doli edhe i pari i kësaj komune, Ilir Peci.
Ai e dënoi një akt të tillë.
“Mbrëmë pas mesnatës ka ndodhur një shpërthim pranë pompës së benzinës Lab-Oil. Nga ky incident nuk ka të lënduar në njerëz vetëm dëme materiale në objektin e pompës dhe disa vetura. Komuna e Zveçanit dënon këtë akt dhe personat të cilët e shkaktuan incidentin. Kryetari i komunës ishte në vendin e ngjarjes për të parë gjendjen dhe për të falënderuar Policinë e Kosovës për gatishmërinë e tyre dhe profesionalizmin e treguar në çdo moment”, tha ai.
Në kohën e shpërthimit pika e karburantit kishte qenë e mbyllur për shërbim.
Rasti të tilla nuk janë të rralla vitet e fundit në veri të Kosovës.
