U nisën për t’i ndërruar kolegët e tyre, në pikën kufitare të Jarinjes.
Por, më 19 shtator të vitit 2013, rruga e gjashtë zyrtarëve të EULEXI-it, do të ndalej dhunshëm këtu në magjistralen Prishtinë – Leposaviq.
Kjo meqë persona të maskuar, shkrepën breshëri plumbash në drejtim të tyre.
Në shtatorin e vitit 2013, persona të panjohur qëlluan me armë zjarri drejt automjetit zyrtar me të cilin po qarkullonin zyrtarë të EULEX-it. Nga këto të shtëna, i vrarë në këtë vend, mbeti një doganier lituanez.
Doganieri i vrarë në këtë vend, ishte Audrius Shenavicius.
Për mbi një dekadë, askush nuk dinte gjë, për autorët e kësaj vepre.
Madje, këta qëndruan në arrati, edhe pse Misioni i Bashkimit Evropian për Sundimin e Ligjit në Kosovë, ofroi një shpërblim, prej 82 mijë eurosh për këdo që ka informacion për kapjen e tyre.
E 12 vjet pas, Njësiti Special i Policisë së Kosovës, zbarkoi edhe një herë në veriun e Vendit.
Krejt kjo nën udhëheqjen e Prokurorisë Speciale të Repbulikës së Kosovës.
Qëllimi i këtij aksioni, ishte të kapen autorët e veprës që kishte tronditur veriun e vendit.
“Hetuesit policorë nga Drejtoria për Hetimin e Krimit të Organizuar dhe Krimeve të Rënda, kanë kryer bastisje në dy (2) lokacione në Zveçan dhe në shtatë (7) lokacione në Zubin Potok, nën dyshimin për kryerjen e veprave penale: -Rrezikimin e personelit të Kombeve të Bashkuara ose personelit në marrëdhënie me to;-Vrasje të Rëndë;-Sulm ndaj personit zyrtarë gjatë kryerjes së detyrës zyrtare”, njoftoi prokuroria.
PSRK, njoftoi se disa persona u shoqëruan në polici, me qëllim të verifikimit të informatave dhe identifikimit të mundshëm të provave relevante.
“Gjatë operacionit, i cili është mbështetur edhe nga njësi të tjera relevante të Policisë së Kosovës, janë shoqëruar në Polici shtatë ( 7 ) persona, dhe pas intervistimit janë liruar në procedurë të rregullt”, u tha nga PSRK.
Në këtë aksion, u gjetën dhe sekuestruan edhe disa prova materiale, përfshirë dy i dy armë, municion, dylbi e dokumente.
