Shoqata e të Drejtave të Pacientëve në Kosovë – PRAK ka reaguar për vdekjen e vajzës katër vjeçare nga Komuna e Gjakovës.
PRAK ka ftuar Prokurorinë e Shtetit, Inspektoratin Shëndetësor dhe Odat e Profesionistëve Shëndetesor që ta hetojnë rastin, ta gjykojnë dhe ta dënojnë në përputhje me shkeljet e evidentuara.
“Nga deklarata e prindërve vërehet një menaxhim jo i mirë i rastit thuajse në secilin segment, brenda të cilit mund të gjenden vepra penale, shkelje etike e profesionale dhe trajtim jo human”, thuhet në reagimin e shoqatës.
Shoqata ka kritikuar stafin shëndetësor, ku sipas saj kanë treguar mungesë të profesionalizmit në menaxhimin e këtyre rasteve.
“Ky rast tregon mirë brishtësinë e sistemit shëndetësor, mungesën e profesionalizmit dhe neglizhencën e një pjese të stafit shëndetësor në menaxhimin e rasteve. Rastet si ky flasin për një pasiguri të sistemit të cilat shkojnë në dëm të pacientëve. Të vdes fëmiu brenda ditës dhe të kemi deklarata kontraverse rreth shkakut, kjo është e papranueshme”, thuhet në njoftimin e PRAK./teve1.info/
