Janë dhjetëra prova në të cilat mbështetet prokuroria për akuzat kundër Naim Murselit, Granit Plavës dhe Kushtrim Kokallës.
Për organizimin dhe kryerjen e vrasjes së Liridona Ademaj, prokuroria gjeti informacione të rëndësishme, nga ekzaminimet e telefonave të të akuzuarve.
Në telefonin e Granit Plavës, prokuroria gjeti biseda me Naim Murselin, të cilat kishin nisur pak ditë para se Plava të shtinte me armë në Liridona Ademajn.
“Në whatsapp janë gjetur kontaktet mes Granit Plavës dhe Naim Murselit, ku të njëjtit kanë filluar të flasin nga data 23.11.23 dhe kanë vazhduar me ditë të tëra deri në datën e vrasjes 29.11.23”, ka thënë Perlinçeviq.
Në kuadër të këtyre bisedave, prokuroria zbuloi edhe përmbajtjen e njërit prej mesazheve që Naim Murseli ia kishte dërguar Plavës.
“Më 28.11.23 në orën 19:04 Naim Murseli ia ka dërguar një mesazh Granit Plavës me tekstin “shok, sigurisht kryhet nesër, a të ka thënë kuqa për paradite”. Pas kësaj mes të pandehurve kanë vazhduar thirrjet me telefon dhe thirrja e fundit mes Naimit e Granitit ka ndodhur në ëhatsapp më 29.11.23 në 19:01 ku kanë biseduar 28 sekonda, gjatë kohës sa Naimi me familje dhe Graniti veçmas kanë qenë në restorantin në Graçanicë. Pas kësaj, Graniti ka paguar llogarinë dhe ka dalë menjëherë nga restoranti dhe e ka pritur Naimin me familjen e tij dhe ka filluar t’i përcjellë deri në vendin e ngjarjes”, është shprehur tutje Perlinçeviq
Si provë prokuroria ka edhe pamjet nga parkingu i restorantit ku u panë për herë të fundit Naim Murselit me familje.
“Pamjet nga parkingu i restorantit shumë mirë shihen veturat e Naimit e Granitit si dhe koha kur Graniti i pari ka dalë nga ai restorant dhe ka pritur në veturën e tij që të dalë Naimi me familjen dhe pasi që ata janë nisur me veturë ky i ka përcjellur më pas”theksoj tutje prokuroria
Kurse, telefonat e Naim Murselit dhe Liridona Ademaj, për prokurorinë ishin të paarritshëm pasi që ata sipas organit akuzues rezultojnë të zhdukur në mënyrë misterioze që nga nata kritike.
Në rast janë të angazhuar edhe autoritetet suedeze. Një përgjigje e tyre, hodhi dritë mbi polisën e sigurimit të Liridona Ademajt, e cila do t’i takonte Naim Murselit në rast të ndonjë fatkeqësie.
“Është pranuar një përgjigje nga autoritetet suedeze që Liridona Murseli ka pasur një polisë të sigurimit jetësorë me fillim të vlefshmërisë 25.06.22 në vlerën prej 3 milionë kruna suedeze, në të cilat është cekur vazhduesi i përfitmit të sigurimit në rast të vdekjes së saj dhe në këto raste sipas ligjit të Suedisë, shfrytëzuesi i polisës do të ishte bashkëshorti” ka dhënë më shumë detja Perlinçeviq
Pjesë e provave materiale të organit akuzues është edhe gjendja financiare e Naim Murselit, sipas së cilës borxhi i Murselit ndaj kompanive të ndryshme dhe personave fizik shkonte në total gati në gjysmë milion euro.
“Vlera e përgjithshme e borxhit të naim Murselit në mars të vitit 2024 kur është bërë analiza e gjendjes së tij financiare ka qenë 475 mijë 968 e 77 euro”, ka përfunduar Perlinçeviq
Në seancën e së hënës, ishte planifikuar qe të shikoheshin edhe video incizimet nga dita kritike, por për shkaqe teknike nuk ishte e mundur.
Paraprakisht, një mundësi të fundit për të dëshmuar, e pati Shaban Murseli.
Mirëpo, as kësaj radhe babi i Naim Murselit nuk erdhi në seancën ku biri i tij, akuzohet se e vrau bashkëshorten, Liridona Ademaj.
Me propozim të prokurores, palët u pajtuan që të lexohet deklarata e Shaban Murseli e dhënë në polici.
