Njësia B1 e Termocentralit Kosova B është shkyçur sërish nga operimi pasditen e së dielës së 8 shkurtit.
Për këtë njoftoi vetë Korporata Energjetike e Kosovës, duke treguar se janë evidentuar rrjedhje të konsiderueshme të avullit në sistemin e gypave.
Tëvë1 ka dërguar pyetje në adresë të KEK-ut, por që gjatë javës të njëjtit nuk kanë treguar se kur pritet të rikthehet në funksion kjo njësi.
Kjo, sipas profesorit të kësaj fushe, e rrezikon stabilitetin e energjisë elektrike në vend.
“Dhe për këtë duhet rritur sasia e energjisë elektrike që importohet dhe kjo çon në rritje të kostos së energjisë elektrike që në fund përkthehet në tarifa më të larta të cilët konsumatorët duhet të paguajnë. Kjo në anën tjetër si për amvisëritë, ashtu edhe për bizneset rrit pasigurinë kostos së furnizimit me energji elektrike”, thotë profesori i Energjisë, Adhurim Hashimusa.
Këto shkyçje po shihen si problematike për qytetarët, pasi që është sezon dimërore dhe kërkesa është shumë e lartë.
“Kështu që edhe nevojat për import rriten sepse nëse një njësi e Kosovës B me prodhim diku neto 250 apo 260 megavat është shumë, për furnizim me energji elektrike të konsumatorëve. Andaj edhe kërkesat për energji janë të mëdha kështu që në këto momente shkyçje ose daljet nga puna janë jo të favorshme edhe nuk kanë ndoshta kuptim të dalin në këtë muaj që jemi”, thotë njohësi i Energjisë, Vezir Rexhepi.
Ditë më parë, ministrja e Ekonomisë, Artane Rizvanolli tha se duhet sakrificë sepse blloqet duhet të ndalen për disa muaj, në mënyrë që të realizohen investime në infrastrukturë.
