Ka arritur në 36 numri i të vdekurve në një aksident hekurudhor të ndodhur në Greqi në mes të dy trenave në orët e vona të së martës.
Të mbijetuarit rrëfyen momentet e tmerrit që përjetuan, ata thanë se disa pasagjerë u hodhën nga dritaret e vagonëve për të shpëtuar.
Një e mbijetuar e aksidentit ka treguar tmerrin siç ka thënë ajo kur njerëzit digjeshin të gjallë.
“Për 10-15 sekonda ishte kaos. Përmbysje, zjarr, kabllo të varura, njerëz të bllokuar, xhamat shpërthyen papritur dhe njerëzit po bërtisnin, kishin frikë. Po digjeshin të gjallë”, rrëfeu për mediat greke një pasagjere.
“Fatmirësisht, ne mundëm të hapnim dyert dhe ikëm shumë shpejt. Në vagonët e tjerë nuk arritën të dilnin, madje një vagon mori flakë tregoi një tjetër udhëtar”.
Pasagjerët e përshkruan aksidentin si një makth që zgjati shumë pak. Ata u transportuan në spitalin e Larisas për të marrë kujdesin e nevojshëm mjekësor.
Ekipet e shpëtimit u munduan të nxirrnin jashtë personat e bllokuar. Ne operacion u përfshinë ushtria dhe mjete të rënda. Rreth 150 zjarrfikës dhe 40 ambulanca shkuan në vendngjarje.
Edhe vullnetarët në vendngjarje pohojnë se tragjedia është shumë e rëndë, ku vijojnë të nxirren trupa të pajetë nga trenat.
“Po jetojmë një tragjedi. Po nxjerrim njerëz të gjallë, të plagosur… ka të vdekur. Do të jemi këtu, derisa të mbarojmë, derisa të gjejmë personin e fundit”, tha një tjetër punonjës vullnetar shpëtimi.
Aksidenti ndodhi ne qytezën Tempe afër Larisës, rreth 380 kilometra në veri të Athinës.
Një tren mallrash, u përplas me një tren pasagjerësh në cilin ndodheshin 350 udhëtarë. Si pasojë e përplasjes 3 vagonë të trenit të udhëtarëve shpërthyen në flakë./Euronewsalbania/
