Kur Kosova po mbushte një vit nga pavarësia, kryeqytetit iu shtua edhe një shkollë.
Me 17 Shkurt të vitit 2009, ky institucion hapi dyert për mbi 700 nxënës të Prishtinës.
E emrin nuk kishte si ta kishte ndryshe përveç “Pavarësia”.
Kështu, nxënësit e mësimdhënësit e kësaj shkolle këtë të premte organizuan një program festiv për të përvjetorin e 16-të.
Për historikun e shkollës foli edhe drejtori i shkollës, Halil Brahaj.
“Shkolla “Pavarësia” e filloi punën një vit pas pavarësisë së Kosovës, me rreth 750 nxënës dhe 36 paralele e 50 mësimdhënës dhe stafin tjetër përcjellës. Sot 16 vite me vonë, shkolla Pavarësia ka mbi 1 mijë e 900 nxënës, 61 paralele e 100 mësimdhënës”, tha Brahaj.
E këtu e pranishme ishte edhe drejtoresha e Arsimit, Jehona Lushaku Sadriu e cila u uroi ditën shkollës.
“Shkolla e juaj është një lindje e re e cila ka lindur me pavarësinë, andaj me lejoni të them që shkolla juaj është një moment tjetër historik, që ngjall ndjenjat tona të atdhedashurisë që lidhet specifikisht me shpalljen e Pavarësisë së Kosovës”, tha Lushaku-Sadriu.
Për të shënuar përvjetorin e republikës së Kosovës e atë të shkollës, prezent ishin edhe mysafirë nga Tirana.
“Ky përvjetori i shkollës suaj bëhet me i veçantë pasi përkon me një datë shumë të rëndësishme, madhështore historike që është pavarësia e Kosovës. Ne jemi një komb, ne luftojmë punojmë fort për të pasur arritje dhe jo vetëm, por që ne jemi krenar për kombin tonë”, tha drejtoresha e shkollës “Misto Mame” në Tiranë, Anila Tabaku.
E gjatë këtij programi u ndanë mirënjohje edhe për nxënësit e dalluar.
“Ndjenjë shumë e mirë, sepse unë kam provuar të mësoj shumë dhe ky është rezultati”, tha nxënësi Agon Çelaj.
Mes tjerash ata folën edhe për rëndësinë e kësaj dite.
“17 Shkurti është dita e pavarësisë kur është shpallur Kosova e pavarur, ditën e diele, në vitin 2008, në orën 3:39”, tha Trojan Janova.
“Me fat pavarësia e shtrenjta Kosovë”, tha nxënësja Ake Berisha.
Në ditën e shkollës u ndanë mirënjohje ish drejtorëve, mësimdhënësve, e stafit që janë pensionuar e që kanë dhënë kontribut në fushën e arsimit.
