Njohësi i çështjeve politike, Selam Shkodra ka vlerësuar se kritikat e Avdullah Hotit ndaj lidershipit të Lidhjes Demokratike të Kosovës për rezultatin zgjedhor i paraprijnë reagimeve të shumë anëtarëve të kësaj partie pas rezultatit dhe procesit zgjedhor.
Ai ka thënë se ish-kryeministri Hoti nga radhët e LDK-së nuk është i vetmi në këtë proces.
“Këtij statusi i paraprinë reagimet që kanë qenë në ditë para pas zgjedhjeve, është një numër i njerëzve që kanë shpreh pakënaqësi për trajtimin e tyre politik veçanërisht gjatë procesit zgjedhor. Avdullah Hoti ka bërë një elaborat që partitë politike ose anëtarë t e kryesive të parive ka një kohë që se kanë pa një të tillë. Me thanë në gjuhën e popullit e ‘ka shti pllugun jashtëzakonisht thellë’, duke i trajtua problemet. Mendoj që nuk i vetëm në këtë proces. Mbledhja e kryesisë mbi 5 orëshe si duket ka tentuar mi fashitë problemet, po sipas gjasave nuk kanë arrit”, ka thënë Shkodra në emisionin “Këndi i Debatit” në Tëvë1.
Ai ka thënë se LDK-së i duhet një reformë reale ose një përçarje më e thellë.
“Mendoj se ky subjekt politik nuk mundet më i shpëtua assesi një procesi të një reforme reale, një proces i ri zgjedhor ose përçarje e thellë”, ka thënë Shkodra.
Hoti ka kritikuar të martën lidershipin e LDK-së për rezultatin e zgjedhje, duke kërkuar ndryshime.
Pas kësaj deklarate ka pasur reagime nga nënkryetari i LDK-së, Gazmen Muhaxheri dhe Doarsa Kica –Xhelili, të cilët kanë kritikuar Hotin.
Por, në mbrojte Hotit i ka dalë ish-nënkryetari i partisë, Agim Veliu.
