Shkëndija e Tetovës ka edhe një motiv shtesë për ta eliminuar Qarabagun e Azerbajxhanit në raundin e tretë kualifikues të Ligës së Kampionëve.
Sot, prej orës 20:00 në Shkup luhet ndeshja e parë kurse ajo e kthimit pas një javë në Azerbajxhan.
Shkëndija tashmë ka shkruar historinë, pasi ka siguruar minimalisht fazën e grupeve të Ligës së Konferencës, sukses që i garanton klubit nga Tetova 5 milionë euro nga UEFA.
Megjithatë, Shkëndija mund ta fitojë dyfishin e kësaj shume nga UEFA, nëse eliminon Qarabagun dhe kualifikohet në “play-off” të Championsit.
Pra, nëse Shkëndija kualifikohet në “play-off” të Ligës së Kampionëve, ka edhe një shpërblim tjetër nga UEFA prej 5 milionë eurosh, që do të thotë eliminimi i Qarabagut në raundin e tretë kualifikues siguron 10 milionë euro për tetovarët.
Nëse eliminohet nga Qarabagu, atëherë Shkëndija do të luajë në “play-off” të Ligës së Evropës dhe për këtë do të marrë 1 milionë euro shtesë, pra 6 milionë euro në total.
