NASA do të zbulojë muajin e ardhshëm emrat e katër astronautëve, tre amerikanë dhe një kanadez, të cilët do të shkojnë rreth Hënës vitin e ardhshëm, tha të enjten kreu i agjencisë hapësinore amerikane.
Administratori i NASA-s Bill Nelson tha se anëtarët e ekuipazhit të misionit të njohur si Artemis 2 do të zbuloheshin më 3 prill.
“Astronautët, tre nga Amerika dhe një nga Kanadaja, do të fluturojnë rreth hënës dhe ata do të testojnë Sistemin e Nisjes Hapësinore të NASA-s, që është raketa jonë, dhe anijen kozmike të quajtur Orion,” tha Nelson.
Misioni i parë Artemis përfundoi në dhjetor me një kapsulë Orion pa ekuipazh që u kthye e sigurt në Tokë pas një udhëtimi 25-ditor rreth Hënës.
Artemis 2, i planifikuar të niset në fund të nëntorit 2024, do të përbëhet nga një ekuipazh prej katër personash rreth Hënës, por pa u ulur në sipërfaqen e satelitit.
Programi ambicioz synon të kthejë njerëzit në Hënë për herë të parë që nga përfundimi i misioneve historike Apollo në 1972.
Artemis 3, i planifikuar rreth 12 muaj pas Artemis 2, do të dërgojë astronautët të zbresin për herë të parë në polin jugor të Hënës.
NASA shpreson të krijojë një prani të qëndrueshme njerëzore në sipërfaqen hënore dhe më vonë të nisë një udhëtim shumëvjeçar në Mars.
Si pjesë e misioneve Artemis, NASA po planifikon të dërgojë një grua dhe një person me ngjyrë në Hënë për herë të parë.
Vetëm 12 njerëz, të gjithë të bardhë, kanë shkelur në Hënë.
Agjencia hapësinore njoftoi gjithashtu të enjten se do të zbulojë një prototip në Hjuston më 15 mars të kostumeve hapësinore të gjeneratës së ardhshme të prodhuara nga Axiom Space që astronautët e NASA-s do të veshin në sipërfaqen e Hënës. /abcnews.al
