Të drejtë votë nuk kanë, por partitë politike nuk po hezitojnë që në tubimet e tyre të kenë edhe fëmijë.
Pothuajse secila prej subjekteve, gjatë fushatës zgjedhore në mesin e tyre kishin prezent edhe persona nën moshën 18 vjeçare.
E kjo sipas Lëvizjes Fol është shkelje e të drejtave të fëmijëve dhe cenim i identitetit të tyre.
“Kemi të bëjmë më shkelje të të drejtave të fëmijëve, me shkelje të identitetit të tyre dhe cenim të identiteti të fëmijëve dhe nuk mund të lejomë të ndodh një gjë e tillë dhe nuk ka as ndërgjegjësim dhe as vetëdije nga partitë politike. Nuk mund të themi se të gjitha partitë politike kanë përdorur fëmijët në fushatë, mirëpo më së shumti mund të themi se prin Lëvizja Vetëvendosje me pranin e fëmijëve nëpër fushata dhe shfrytëzimin e tyre pastaj vijën partitë e tyre siç janë LDK, PDK , të cilët gjithashtu edhe ata në ditët e para të fushatës kanë përdorur fëmijëve”, tha Viona Bunjaku nga Lëvizja Fol.
E ani pse prezenca e fëmijëve është shkelje edhe me rregullat e zgjedhjeve, asnjë gjobë nuk është shqiptuar nga Paneli Zgjedhor për Ankesa dhe Parashtresa.
“Deri me tani janë shqiptuar shumë dënime për shkelje të rregullave të zgjedhjeve mirëpo nuk është shqiptuar asnjë dënim i cili i sanksionon keqpërdorimet e këtyre fëmijëve në fushatë, kjo është në kundërshtim me ligjin edhe me të drejtat e njeriut në kundërshtim edhe me ligjin për zgjedhje, por si duket nuk ka pasur as interesim me parandalua e as duket që nuk është një fenomen dhe si duket e kanë kaluar në heshtje në të gjitha zgjedhjet”, tha Behxhet Shala nga KMDLNj.
Sociologu, Genc Xërxa ka treguar se si ndikon prezenca e tyre në tubimet politike.
“Duke e ditur që janë nën moshën 18 vjeç dhe nuk kanë mundësi që të jenë pjesëmarrës në garë apo në procese zgjedhore, mendoj që është mëse e dëmshme të manipulohet, keqpërdoret për qëllime të caktuara, nga partitë e ndryshme politike”, tha Xërxa.
Për prezencën e fëmijëve në tubime të partive politike ditë më parë ka reaguar edhe Koalicioni i Organizatave për Mbrojtjen e Fëmijëve (KOMF), me thirrjen që të njëjtit mos të shfrytëzohen. /teve1.info/
