Deputetja e PDK-së, Blerta Deliu Kodra është shkarkuar nga pozita e anëtares së Komisionit për kompensimin e viktimave të krimit. Shkarkimi i saj u bë me kërkesë të ministres së Drejtësisë, Albulena Haxhiu. Derisa, të dyja këto u përplasen sot në mbledhjen e komisionit.
Kërkesën e nisi në muajin gusht, e finalizoi në mbledhjen e kësaj të marte.
Me kërkesë të ministres së drejtësisë, Albulena Haxhiu, është shkarkuar deputetja Blerta Deliu – Kodra, nga pozita e anëtares së Komisionit për kompensimin e viktimave të krimit, që funksionon në kuadër të Ministrisë së Drejtësisë.
Me katër vota për e dy abstenime u bë shkarkimi i deputetes së PDK-së nga ky komision, e cila këtë e quajti si linçim publik ndaj saj nga ministrja e Drejtësisë.
Por në arsyetimin e ministrisë së Drejtësisë, thuhet se deputetja Deliu – Kodra mungoi në 9 nga 16 mbledhjet e Komisionit që janë mbajtur në periudhën 2022-2023 dhe përkundër mospjesëmarrjes së saj, u kompensua nga buxheti i shtetit në shumë prej 2351 euro.
Bile, Haxhiu e ka edhe një kërkesë tjetër ndaj deputetes së PDK-së.
Debati mes tyre vazhdoi nën akuzën se e para e ministrisë së Drejtësisë e kishte quajtur hajneshë deputeten Deliu – Kodra, në njërin nga emisionet vendore.
Por, që kjo u mohua nga ministrja Haxhiu.
Në debat u përfshi deputeti tjetër i PDK-së, Hajdar Beqa, i cili e akuzoi ministren Haxhiu se ka inate personale me kolegen e saj partiake.
“Po e shoh se keni bërë personale me deputeten Deliu dhe nuk është e sinqertë kjo kërkesë dhe shkresë e juaja”, tha Beqa.
Në anën tjetër, deputeti i LDK-së, Driton Selmanaj tha se ministrja Haxhiu s’ka pasur nevojë të merr pjesë në këtë pikë të mbledhjes së komisionit, pasi kjo çështje i takon vetëm atyre.
“Unë kërkoj kryetar që ministren dhe stafin ta lirojë dhe ne dokumentet t’i analizojmë dhe të merret një vendim se a na përfaqëson denjësisht apo jo kjo deputete dhe ne marrim vendim”, u shpreh Selmanaj.
Ndërkohë, Krahas kësaj komisioni miratoi edhe Projektligjin për falimentim dhe Projektligjin për shërbime sociale dhe familjare.
Arton Rama
