Fillimisht kishte dalë për të protestuar para objektit të Ministrisë së Punëve të Jashtme dhe Diasporës.
E më pas, Albert Prenkaj, drejtor i Departamentit për Amerikë kishte ushtruar padi ndaj Ministrisë ku punon, duke kundërshtuar një rregullore për sistematizimin e punonjësve të këtij institucioni.
Gjashtë muaj më pas, Gjykata Themelore i dha të drejtë Prenkajt duke e detyruar kështu dikasterin në fjalë që ta anulojë vendimin.
E një ditë pas kësaj, MPJD mori vendim për pezullimin e tij nga puna. Në një prononcim për tëvë1, Prenkaj thotë se kjo ka ndodhur në shenjë hakmarrjeje ndaj tij.
Tutje, ai shprehet se do t’i ndjekë rrugët ligjore pasi siç thotë ai, ligji do të mbisundojë në padrejtësitë ndaj tij.
Pakënaqësitë e tyre ndaj këtij vendimi i kanë shprehur edhe Sindikata e Punëtorëve të kësaj Ministrie.
“Shoqata Sindikale e konsideron si pjesë të fushatës hakmarrëse nga menaxhmenti i MPJD-së i vendosur në mënyrë të kundërligjshme në MPJD ndaj Ambasadorit të karrierës z. Prenkaj, ndër të tjera, edhe për shkak të pjesëmarrjes së tij në aktivitetet e Shoqatës Sindikale, duke qenë edhe anëtar i saj, gjatë të cilave aktivitete janë denoncuar kundërligjshmëritë në MPJD, duke përfshirë edhe Rregulloren nr. 01/2022 për Organizimin e Brendshëm dhe Sistematizimin e Vendeve të Punës në MPJD”, thuhet në qëndrimin e Sindikatës.
Tëvë1 ka tentuar gjatë ditës të marrë një përgjigje edhe nga Ministria e Punëve të Jashtme, rreth këtyre pretendimeve, mirë nga kjo ministri nuk kanë shprehur gatishmëri për t’iu përgjigj interesimit të televizionit.
Kronika e gazetarit Lindrit Zejnullahu.
