Këshilltari komunal në Preshevë, Argjend Sherifi është larguar nga partia Alternativa për Ndryshim, të cilën e drejton kryetari i komunës, Shqiprim Arifi.
Sherifi në një lidhje direkte në Tëvë1, tha se njëra nga arsyet më të forta që e shtyn drejt largimit të tij, ishte vendimi i kryetarit Arifi, për të mos mbajtur asnjë takim me kryeministrin, Albin Kurti, shkruan teve1.info.
“Fillimi ishte i mirë dhe i kënaqshëm. Vendimi i Arifit të mos i shkojë në asnjë takim Kurtit, ishte arsyeja më e fortë, realisht për shkëputjen e Komunës së Preshevës nga komunikimi me Republikën e Kosovës. Kryetari bënte dallime të politikave të ndryshme atje. Pas një kohe filluan pakënaqësitë, me shkëputjen e kryesisë nga strukturat duke mos dhënë informacione lidhur me vendimet të cilat i merrnin. Isha një nga këshilltarët që bëra kërkesë te kryetari i komunës, që në raport me politikat rajonale, ne si subjekt duhej të kishim disa pika të vendosura në mënyrë të përbashkët”, deklaroi Sherifi në emisionin “Ditari”.
Madje sipas tij, Lugina e Preshevës ka nevojë për bashkëpunim me secilin subjekt që vije në Qeveri.
I pyetur se a ka pasur presion nga ndonjë parti tjetër politike për marrjen e këtij vendimi, Sherifi tregoi se fillimisht ka biseduar me subjektin e tij, e më pas ka vazhduar komunikimin edhe me subjektet tjera.
“Ky vendim është marrë për një kohë të shkurtër. Kur kam vendosur ta marrë këtë vendim, kam pritur disa ditë për ta parë se si do të reagoja unë në vetveten. Kur e kam marrë këtë vendim, fillimisht kam kontaktuar me subjektin tim, të cilët në shumicë më kanë mbështetur në heshtje. Por, kur ka qenë fjala për të parin e partisë, nuk është marrë guximi që të ndërmerret ndonjë hap. Pastaj kam vazhduar komunikimin edhe me subjektet tjera”, tregoi tutje Sherifi.
Ndërkaq lidhur me takimin e mbajtur me kryeministrin, Albin Kurti, Sherifi tha se Kurti ishte i rezervuar, derisa tregoi që takimin me të e kërkoi me urgjencë.
“Takimin me kryeministrin, Albin Kurti, e kërkova unë me urgjencë. Kurti ishte i rezervuar, por tha që Qeveria e Kosovës ishte e gatshme të bashkëpunojë me të gjitha subjektet politike në Komunën e Preshevës”, shtoi tutje Sherifi.
Kujtojmë që në një reagim të Sherifit, ai ka thënë se nuk është pajtuar me përplasjet që Arifi ka pasur me Qeverinë në Kosovë./teve1.info/.
