Me intonimin e himnit të Republikës së Kosovës filloi ceremonia.
E ata që do t’i shërbejnë nga kjo e premte një institucioni të rëndësishëm, u rreshtuan me njëri-tjetrin.
Këta janë 111 kadetë të Shërbimit Korrektues të cilët diplomuan pas një trajnimi disa mujor.
Gëzimi qe i madh kur u dha urdhri për t’u liruar nga trajnimi.
Në këtë ceremoni i pranishëm ishte dhe kryeministri, Albin Kurti i cili tha se diplomimi i gjeneratës së 45-të të kadetëve të Shërbimit Korrektues, është rrugëtim kyç për drejtësi.
“Diplomimi i 111 kadetëve sot, nuk është thjesht një ceremoni por një dëshmi e angazhimit tonë për një sistem korrektues të fuqishëm, të sigurt dhe të drejtë. Nga sot ju do të jeni pjesë një mekanizmi kyç për shtetin e së drejtës një mekanizëm që kërkon disiplinë, profesionalizëm dhe përkushtim të plotë”, tha Kurti.
Ministrja e Drejtësisë, vlerësoi se kjo gjeneratë do të shërben me profesionalizëm.
“Ky institucion nuk është thjeshtë një hallkë e drejtësisë por një mekanizëm vendimtarë për sigurinë publike, rehabilitimin e të dënuarve dhe garantimin e një sistemi korrektues që mbështetet në ligj, profesionalizëm dhe dinjitet njerëzorë”, tha Albulena Haxhiu.
Drejtori i ShKK-së, Ismajl Dibrani deklaroi se me këtë gjeneratë do të ketë rol të fuqishëm në sistemin e drejtësisë.
“Me etikë, përkushtim të lartë dhe profesionalizëm ju do të luani një rol kyc në forcimin e sistemit të drejtësisë në vendin tonë. Mbështetja e Qeverisë së Republikës së Kosovës, e kabinetit të ministres Haxhiu, ambasadës Amerikane, Eulexi e organizata tjera ndërkombëtare dhe vendore, ka qenë jetike në arritjen e nivelit të Shërbimit Korrektues të Kosovës në përputhje me standardet ndërkombëtare”, tha Dibrani.
Në fund, kryeministri Kurti ndau edhe certifikata për 111 kadetët e Shërbimit Korrektues të Kosovës.
